പ്രമേഹമുള്ളവർക്കും മാമ്പഴം കഴിക്കാം; ഈ ഒരൊറ്റ നിബന്ധന പാലിച്ചാൽ മാത്രം മതി

പഴങ്ങളുടെ രാജാവ് എന്നാണ് മാമ്പഴം അറിയപ്പെടുന്നത്. അതിന്റെ രുചിയും മണവും ആരെയും കൊതിപ്പിക്കുന്നതാണ്. എന്നാൽ പ്രമേഹരോഗികളെ സംബന്ധിച്ചിടത്തോളം മാമ്പഴം കഴിക്കുന്നത് എപ്പോഴും വലിയൊരു ആശങ്കയാണ്. മാമ്പഴത്തിലെ ഉയർന്ന പഞ്ചസാരയുടെ അളവ് രക്തത്തിലെ ഗ്ലൂക്കോസ് നില വർധിപ്പിക്കുമോ എന്നതാണ് പ്രധാന പേടി. പ്രമേഹമുള്ളവർ മാമ്പഴം കഴിക്കാൻ പാടില്ല എന്നുതന്നെയാണ് സാധാരണയായി പറഞ്ഞുകേൾക്കാറുള്ളതും. എന്നാൽ പ്രമേഹമുള്ളവർക്ക് മാമ്പഴം പൂർണമായും ഒഴിവാക്കേണ്ടതുണ്ടോ അതോ മിതമായ രീതിയിൽ കഴിക്കാമോ എന്ന് നമുക്ക് പരിശോധിക്കാം. ചില മുൻകരുതലുകൾ എടുത്താൽ പ്രമേഹരോഗികൾക്കും മാമ്പഴം ആസ്വദിക്കാവുന്നതാണെന്നാണ് ആരോ​ഗ്യവി​ദ​ഗ്ധരുടെ അഭിപ്രായം. മാമ്പഴത്തിൽ പ്രകൃതിദത്തമായ പഞ്ചസാര ധാരാളമായി അടങ്ങിയിട്ടുണ്ട്. ഏകദേശം 90 ശതമാനം കലോറിയും പഞ്ചസാരയിൽ നിന്നാണ് ലഭിക്കുന്നത്. ഇത് പ്രമേഹരോഗികളിൽ രക്തത്തിലെ പഞ്ചസാരയുടെ അളവ് പെട്ടെന്ന് ഉയരാൻ കാരണമായേക്കാം. എന്നാൽ മാമ്പഴത്തിൽ നാരുകളും ആന്റിഓക്സിഡന്റുകളും ധാരാളമുണ്ട്. ഈ നാരുകൾ രക്തത്തിലേക്ക് പഞ്ചസാര ആഗിരണം ചെയ്യപ്പെടുന്നതിന്റെ വേഗത കുറയ്ക്കാൻ സഹായിക്കുന്നു. അതിനാൽ മാമ്പഴം കഴിക്കുമ്പോൾ രക്തത്തിലെ ഗ്ലൂക്കോസ് നില നിയന്ത്രിക്കാൻ ശരീരത്തിന് സാധിക്കും. ഒരു ഭക്ഷണപദാർഥം രക്തത്തിലെ പഞ്ചസാരയെ എങ്ങനെ ബാധിക്കുന്നു എന്ന് അളക്കുന്നത് ഗ്ലൈസമിക് ഇൻഡക്സ് വഴിയാണ്. മാമ്പഴത്തിന്റെ ഗ്ലൈസമിക് ഇൻഡക്സ് 51 ആണ്. ഇത് താഴ്ന്ന നിലവാരത്തിലുള്ള ഒന്നായാണ് കണക്കാക്കപ്പെടുന്നത്. അതായത് മാമ്പഴം കഴിക്കുന്നത് മറ്റ് ചില മധുരപലഹാരങ്ങളെപ്പോലെ രക്തത്തിലെ പഞ്ചസാര പെട്ടെന്ന് വർധിപ്പിക്കില്ല. എങ്കിലും പ്രമേഹരോഗികൾ മാമ്പഴം കഴിക്കുമ്പോൾ അളവ് കൃത്യമായി പാലിക്കേണ്ടതുണ്ട്. ഒരു ദിവസം ഒരു ചെറിയ കഷ്ണം മാമ്പഴം കഴിക്കുന്നത് സാധാരണഗതിയിൽ സുരക്ഷിതമാണ്. പ്രമേഹരോഗികൾ മാമ്പഴം കഴിക്കുമ്പോൾ ശ്രദ്ധിക്കേണ്ട പ്രധാന കാര്യം അത് എപ്പോൾ കഴിക്കുന്നു എന്നതാണ്. ഭക്ഷണത്തിന് തൊട്ടുപിന്നാലെ മാമ്പഴം കഴിക്കുന്നത് ഒഴിവാക്കണം. ഇത് രക്തത്തിലെ പഞ്ചസാരയുടെ അളവ് അമിതമായി വർധിപ്പിക്കാൻ കാരണമാകും. പകരം ഒരു ഇടവേള ഭക്ഷണമായി മാമ്പഴം കഴിക്കുന്നതാണ് ഉചിതം. മാമ്പഴത്തോടൊപ്പം പ്രോട്ടീൻ അടങ്ങിയ ഭക്ഷണങ്ങൾ ഉൾപ്പെടുത്തുന്നത് നല്ലതാണ്. ഉദാഹരണത്തിന് ഒരു പുഴുങ്ങിയ മുട്ടയോ അല്ലെങ്കിൽ കുറച്ച് നട്സോ മാമ്പഴത്തിനൊപ്പം കഴിക്കുന്നത് പഞ്ചസാരയുടെ ആഗിരണം സാവധാനത്തിലാക്കാൻ സഹായിക്കും. മാമ്പഴം ജ്യൂസ് രൂപത്തിൽ കഴിക്കുന്നത് പ്രമേഹരോഗികൾക്ക് ഒട്ടും നല്ലതല്ല. മാമ്പഴം ജ്യൂസ് അടിക്കുമ്പോൾ അതിലെ നാരുകൾ നഷ്ടപ്പെടുകയും പഞ്ചസാരയുടെ സാന്ദ്രത വർധിക്കുകയും ചെയ്യുന്നു. ഇത് രക്തത്തിലെ ഗ്ലൂക്കോസ് നില പെട്ടെന്ന് ഉയർത്താൻ കാരണമാകും. അതിനാൽ മാമ്പഴം കഷ്ണങ്ങളായി മുറിച്ച് പതുക്കെ ചവച്ചരച്ച് കഴിക്കുന്നതാണ് ഏറ്റവും മികച്ച രീതി. ചവച്ചരച്ച് കഴിക്കുമ്പോൾ ഉമിനീരുമായി കലർന്ന് ദഹനം മെച്ചപ്പെടുകയും പഞ്ചസാരയുടെ ആഗിരണം നിയന്ത്രിക്കപ്പെടുകയും ചെയ്യുന്നു. മാമ്പഴത്തിൽ അടങ്ങിയിരിക്കുന്ന വിറ്റാമിൻ എ, വിറ്റാമിൻ സി എന്നിവ രോഗപ്രതിരോധ ശേഷി വർധിപ്പിക്കാൻ സഹായിക്കുന്നവയാണ്. കൂടാതെ ഇതിലെ പൊട്ടാസ്യം ഹൃദയാരോഗ്യത്തിനും ഗുണകരമാണ്. പ്രമേഹരോഗികൾക്ക് ഇത്തരം പോഷകങ്ങൾ ആവശ്യമാണെങ്കിലും മാമ്പഴത്തിന്റെ അളവ് നിയന്ത്രിക്കാതിരുന്നാൽ അത് ഗുണത്തേക്കാൾ ദോഷം ചെയ്യും. ഒരാളുടെ രക്തത്തിലെ പഞ്ചസാരയുടെ അളവ് എത്രത്തോളമുണ്ടെന്ന് നോക്കി വേണം മാമ്പഴത്തിന്റെ അളവ് തീരുമാനിക്കാൻ. കഠിനമായ പ്രമേഹമുള്ളവർ മാമ്പഴം കഴിക്കുന്നതിന് മുൻപ് ഡോക്ടറുടെ നിർദേശം തേടുന്നത് നന്നായിരിക്കും. ശാരീരിക അധ്വാനം ചെയ്യുന്നവർക്ക് മാമ്പഴം കഴിക്കുന്നത് വലിയ പ്രശ്നമുണ്ടാക്കാറില്ല. കാരണം വ്യായാമത്തിലൂടെ അധികമായി എത്തുന്ന കലോറി എരിച്ചുകളയാൻ അവർക്ക് സാധിക്കുന്നു. മാമ്പഴം കഴിച്ച ദിവസം മറ്റ് കാർബോഹൈഡ്രേറ്റുകൾ അടങ്ങിയ ഭക്ഷണത്തിന്റെ അളവ് കുറയ്ക്കുന്നത് നല്ലതാണ്. ഉദാഹരണത്തിന് മാമ്പഴം കഴിക്കുന്ന ദിവസം ചോറിന്റെയോ ചപ്പാത്തിയുടെയോ അളവ് കുറയ്ക്കാം. ഇത് ശരീരത്തിലെ മൊത്തത്തിലുള്ള കാർബോഹൈഡ്രേറ്റ് നില തുല്യമായി നിലനിർത്താൻ സഹായിക്കും. മാമ്പഴം പ്രമേഹരോഗികൾക്ക് ഒരു ‘നിഷിദ്ധ പഴം’ അല്ല എന്ന് തന്നെയാണ് ആരോ​ഗ്യവി​ദ​ഗ്ധരുടെ പക്ഷം. കൃത്യമായ അളവിലും ശരിയായ സമയത്തും കഴിച്ചാൽ പ്രമേഹമുള്ളവർക്കും മാമ്പഴത്തിന്റെ രുചി ആസ്വദിക്കാം. മിതത്വം പാലിക്കുക എന്നതാണ് പ്രധാനം. നിങ്ങളുടെ ശരീരത്തിന്റെ അവസ്ഥ മനസിലാക്കി ആരോഗ്യകരമായ ഭക്ഷണശീലങ്ങൾ പിന്തുടരുക. കൃത്യമായ പരിശോധനകളും ഡോക്ടറുടെ നിർദേശങ്ങളും പാലിച്ച് കൊണ്ട് നമുക്ക് പ്രിയപ്പെട്ട ഭക്ഷണങ്ങൾ മിതമായ രീതിയിൽ ജീവിതത്തിന്റെ ഭാഗമാക്കാം.