ലൈംഗിക പീഡന പരാതി; രാഹുൽ മാങ്കൂട്ടത്തിലിന്‍റെ അറസ്റ്റിന് തടസമില്ലെന്ന് നിയമോപദേശം
തിരുവനന്തപുരം: യുവതിയുമായി നടത്തുന്ന സംഭാഷണത്തിന്‍റെ ശബ്ദരേഖ തൻ്റേതെന്ന് സമ്മതിച്ച് രാഹുൽ മാങ്കൂട്ടത്തിൽ. തനിക്കെതിരെയുള്ള ആരോപണങ്ങളിൽ പലതും ശരിവച്ചു. മുൻകൂർ ജാമ്യാപേക്ഷയിലാണ് നിർണായക വിവരങ്ങൾ. ഇതുവരെ രാഹുൽ ഇക്കാര്യം സമ്മതിച്ചിരുന്നില്ല.അതേസമയം രാഹുലിന്‍റെ അറസ്റ്റിന് തടസമില്ലെന്നാണ് നിയമോപദേശം. മുൻകൂർ ജാമ്യാപേക്ഷ നൽകിയിരിക്കുന്നത് തടസമാകില്ല. ഒളിവിൽ പോയ രാഹുലിനായ് പൊലീസ് അന്വേഷണം ഊർജിതമാക്കിയിട്ടുണ്ട്. പാലക്കാട്‌, കൊച്ചി, തിരുവനന്തപുരം ജില്ലകളിൽ നിരീക്ഷണം ശക്തമാക്കാനാണ് നിർദേശം. രാഹുൽ കേരളം വിട്ടു പോയിട്ടില്ലെന്ന് വിലയിരുത്തൽ. നേതാക്കളുടെ വീടുകൾ കേന്ദ്രീകരിച്ചും നിരീക്ഷണം നടത്തുന്നുണ്ട്.-അതിജീവിതയുടെ വൈദ്യപരിശോധന പൂര്‍ത്തിയാക്കിയിട്ടുണ്ട്. യുവതിയെ ചികിത്സിച്ച ഡോക്ടറുടെ മൊഴി ഉടനെടുക്കും.ആദ്യവിവാഹം ഒഴിഞ്ഞശേഷമാണ് രാഹുലിനെ പരിചയപ്പെട്ടതെന്ന് യുവതി പറയുന്നു. 2024 ആഗസ്ത് 22നായിരുന്നു വിവാഹം. നാല് ദിവസം മാത്രമാണ് ഒരുമിച്ച് ജീവിച്ചത്. ഒരു മാസത്തിനുള്ളിൽ ബന്ധം ഒഴിഞ്ഞു. രാഹുലുമായി പരിചയപ്പെടുന്നത് പിന്നീട് 5 മാസത്തിന് ശേഷമെന്നും യുവതി പറയുന്നു. ഭര്‍ത്താവുള്ളപ്പോഴാണ് രാഹുലുമായി ബന്ധമെന്നായിരുന്നു ആരോപണം.
