മോട്ടോർ വാഹന നിയമത്തില് നിർണ്ണായകമായ 20 മാറ്റങ്ങള് നിലവിൽ വന്നു
വാഹന ഉടമകള്ക്കും ഡ്രൈവർമാർക്കും വലിയ ആശ്വാസം നല്കിക്കൊണ്ട് കേന്ദ്ര മോട്ടോർ വാഹന നിയമത്തില് നിർണ്ണായകമായ 20 മാറ്റങ്ങള് നിലവില് വന്നു.
ഡിജിറ്റല് ഇന്ത്യയുടെ ഭാഗമായി ആർടിഒ ഓഫീസുകളിലെ തിരക്ക് കുറക്കാനും അഴിമതി ഇല്ലാതാക്കാനും ലക്ഷ്യമിട്ടാണ് ഈ പരിഷ്കാരങ്ങള്. ഇതില് ഏറ്റവും പ്രധാനപ്പെട്ടത് ഡ്രൈവിങ് ലൈസൻസ് കാലാവധി സംബന്ധിച്ച പുതിയ ഇളവാണ്.
സാധാരണക്കാരന്റെ ജീവിതം സുഗമമാക്കാനും വ്യാപാര സൗകര്യങ്ങള് വർദ്ധിപ്പിക്കാനും ലക്ഷ്യമിട്ടുള്ള ചരിത്രപരമായ ‘ജൻ വിശ്വാസ്’ ഭേദഗതി ബില്ലാണ് പാർലമെന്റില് അവതരിപ്പിച്ചത്. കേന്ദ്ര വാണിജ്യ വ്യവസായ സഹമന്ത്രി ജിതിൻ പ്രസാദ അവതരിപ്പിച്ച ഈ ബില്, 23 മന്ത്രാലയങ്ങള്ക്ക് കീഴിലുള്ള 79 നിയമങ്ങളിലായി 784 ഭേദഗതികളാണ് നിർദ്ദേശിക്കുന്നത്. ഇതില് ഏറ്റവും പ്രധാനപ്പെട്ടത് 1988-ലെ മോട്ടോർ വാഹന നിയമത്തില് വരുത്തിയ മാറ്റങ്ങളാണ്.
*പ്രധാന മാറ്റങ്ങള് ഇവയാണ്*
1. ഡ്രൈവിങ് ലൈസൻസ് കാലാവധി കഴിഞ്ഞ് 30 ദിവസം കൂടി ഉപയോഗിക്കാം
മുമ്പ് ലൈസൻസ് കാലാവധി കഴിഞ്ഞാല് അന്നുതന്നെ അത് അസാധുവായിരുന്നു. എന്നാല് പുതിയ നിയമപ്രകാരം, കാലാവധി കഴിഞ്ഞ് 30 ദിവസത്തെ ഗ്രേസ് പിരിയഡ് അനുവദിച്ചിട്ടുണ്ട്. ഈ കാലയളവിനുള്ളില് പിഴയില്ലാതെ ലൈസൻസ് ഉപയോഗിച്ച് വാഹനം ഓടിക്കാനും പുതുക്കാനും സാധിക്കും.
2. ലേണേഴ്സ് ലൈസൻസ് ടെസ്റ്റ് ഇനി വീട്ടിലിരുന്ന്.
ലേണേഴ്സ് ലൈസൻസിനായി ആർടിഒ ഓഫീസില് ക്യൂ നില്ക്കേണ്ടതില്ല. ആധാർ കാർഡ് ഉപയോഗിച്ച് ഓണ്ലൈൻ വഴി അപേക്ഷിക്കാം. വീട്ടിലിരുന്ന് തന്നെ കമ്പ്യൂട്ടറിലോ സ്മാർട്ട് ഫോണിലോ ലേണേഴ്സ് പരീക്ഷ എഴുതാം. വിജയിച്ചാല് ഉടൻ തന്നെ ലേണേഴ്സ് ഡൗണ്ലോഡ് ചെയ്ത് എടുക്കാം.
3. ആധാർ അധിഷ്ഠിത സമ്പർക്കരഹിത സേവനങ്ങള്.
മോട്ടോർ വാഹന വകുപ്പിന്റെ ഏകദേശം 18-ഓളം സേവനങ്ങള് ഇപ്പോള് പൂർണ്ണമായും ഓണ്ലൈനായി. വിലാസം മാറ്റുക, ഡ്യൂപ്ലിക്കേറ്റ് ലൈസൻസ് എടുക്കുക, എൻഒസി അപേക്ഷകള് തുടങ്ങിയവയ്ക്ക് ആധാർ വെരിഫിക്കേഷൻ വഴി ആർടിഒ ഓഫീസില് നേരിട്ട് പോകാതെ തന്നെ അപേക്ഷിക്കാം.
4. ഡ്രൈവിങ് സ്കൂള് സർട്ടിഫിക്കറ്റ് ഉണ്ടെങ്കില് ആർടിഒ ടെസ്റ്റ് ഒഴിവാക്കാം.
അംഗീകൃത ഡ്രൈവിങ് ട്രെയിനിങ് സെന്ററുകളില് നിന്ന് മികച്ച രീതിയില് പരിശീലനം പൂർത്തിയാക്കി സർട്ടിഫിക്കറ്റ് ലഭിക്കുന്നവർക്ക് ആർടിഒ ടെസ്റ്റ് ഇല്ലാതെ തന്നെ ഡ്രൈവിങ് ലൈസൻസ് ലഭിക്കും. നിലവില് വലിയ നഗരങ്ങളിലാണ് ഈ സംവിധാനം തുടങ്ങിയിട്ടുള്ളത്.
5. ലൈസൻസ് പുതുക്കാൻ 1 വർഷം മുമ്പ് അപേക്ഷിക്കാം.
ലൈസൻസ് കാലാവധി തീരുന്നതിനായി കാത്തിരിക്കേണ്ടതില്ല. കാലാവധി കഴിയുന്നതിന് ഒരു വർഷം മുമ്പ് തന്നെ പുതുക്കാനുള്ള അപേക്ഷ സമർപ്പിക്കാം. കാലാവധി കഴിഞ്ഞ് ഒരു വർഷത്തിന് ശേഷമാണ് പുതുക്കുന്നതെങ്കില് വീണ്ടും ഡ്രൈവിങ് ടെസ്റ്റ് നടത്തേണ്ടി വരും.
6. മെഡിക്കല് സർട്ടിഫിക്കറ്റ് ഓണ്ലൈനായി സമർപ്പിക്കാം.
40 വയസ്സിന് മുകളില് പ്രായമുള്ളവർ ലൈസൻസ് പുതുക്കുമ്പോള് മെഡിക്കല് സർട്ടിഫിക്കറ്റ് ഹാജരാക്കണം. ഇത് ഇപ്പോള് പരീവാഹൻ പോർട്ടലിലൂടെ ഡോക്ടർമാർക്ക് നേരിട്ട് അപ്ലോഡ് ചെയ്യാം. അംഗീകൃത ഡോക്ടർമാർ ഓണ്ലൈനായി സാക്ഷ്യപ്പെടുത്തിയാല് മതിയാകും.
7. വാഹനം വില്ക്കുമ്പോള് ഉടമസ്ഥാവകാശം മാറ്റുന്നത്.
ഒരു സംസ്ഥാനത്തിനുള്ളില് തന്നെ വാഹനം വില്ക്കുമ്പോള് ആർസി ബുക്ക് ഉടമസ്ഥാവകാശം മാറ്റാൻ പരീവാഹൻ പോർട്ടല് വഴി ഓണ്ലൈനായി അപേക്ഷിക്കാം. വില്ക്കുന്ന ആളിന്റെയും വാങ്ങുന്ന ആളിന്റെയും ആധാർ വെരിഫിക്കേഷൻ വഴി ഇത് വേഗത്തില് പൂർത്തിയാക്കാം.
8. വിലാസം മാറ്റുന്നത് ലളിതമാക്കി.
ലൈസൻസിലെയോ ആർസിയിലെയോ വിലാസം മാറ്റാൻ ഇപ്പോള് ആധാർ കാർഡിലെ വിലാസം മതിയാകും. ഓണ്ലൈൻ അപേക്ഷയില് ആധാർ ലിങ്ക് ചെയ്യുന്നതോടെ പുതിയ വിലാസം ഓട്ടോമാറ്റിക്കായി അപ്ഡേറ്റ് ചെയ്യപ്പെടും.
9. ഡിജിറ്റല് രേഖകള്ക്ക് ഒറിജിനലിന് തുല്യമായ അംഗീകാരം.
പരിശോധന വേളയില് ലൈസൻസ്, ആർസി, ഇൻഷുറൻസ് എന്നിവയുടെ ഒറിജിനല് കൈവശമില്ലെങ്കിലും കുഴപ്പമില്ല. കേന്ദ്ര സർക്കാരിന്റെ ഡിജി ലോക്കർ അല്ലെങ്കില് എം-പരിവാഹൻ ആപ്പില് കാണിക്കുന്ന ഡിജിറ്റല് രേഖകള് നിയമപരമായി സാധുവാണ്.
10. ലേണേഴ്സ് ലൈസൻസിന് പാഠ്യപദ്ധതി നിർബന്ധം.
ലേണേഴ്സ് ലൈസൻസ് ലഭിക്കുന്നതിന് മുമ്പ് ട്രാഫിക് നിയമങ്ങള്, റോഡ് സുരക്ഷാ ബോധവല്ക്കരണം എന്നിവയെക്കുറിച്ച് ചുരുങ്ങിയത് 8 മണിക്കൂറെങ്കിലും ഓണ്ലൈൻ വഴിയോ നേരിട്ടോ ക്ലാസ്സുകളില് പങ്കെടുക്കണമെന്നും പുതിയ നിർദ്ദേശമുണ്ട്.
*ഒറ്റനോട്ടത്തില് അറിയാം*
•30 ദിവസത്തെ ഗ്രേസ് പിരിയഡ്: ലൈസൻസ് കാലാവധി കഴിഞ്ഞാലും അടുത്ത 30 ദിവസം കൂടി അത് ഉപയോഗിച്ച് വാഹനം ഓടിക്കാം.
• ഓണ്ലൈൻ ലേണേഴ്സ് ടെസ്റ്റ്: ആധാർ ഉപയോഗിച്ച് വീട്ടിലിരുന്ന് തന്നെ ലേണേഴ്സ് പരീക്ഷ എഴുതാം. ആർടിഒ ഓഫീസില് പോകേണ്ടതില്ല.
• രജിസ്ട്രേഷൻ പരിധി ഒഴിവാക്കി: വാഹനം രജിസ്റ്റർ ചെയ്യാൻ പ്രത്യേക ആർടിഒ പരിധി വേണ്ട. ഒരു സംസ്ഥാനത്തെ ഏത് ആർടിഒ ഓഫീസിലും രജിസ്ട്രേഷൻ നടത്താം.
• രജിസ്ട്രേഷൻ ക്യാൻസലേഷൻ റിപ്പോർട്ടിംഗ്: വാഹനം നശിപ്പിക്കുകയോ മറ്റോ ചെയ്താല് രജിസ്ട്രേഷൻ റദ്ദാക്കാൻ റിപ്പോർട്ട് ചെയ്യാനുള്ള സമയം 14 ദിവസത്തില് നിന്ന് 30 ദിവസമായി ഉയർത്തി.
• ഇൻഷുറൻസ് കൈമാറ്റം: വാഹനം വില്ക്കുമ്പോള് ഇൻഷുറൻസ് സർട്ടിഫിക്കറ്റ് മാറ്റുന്ന വിവരം ഇൻഷുറർക്ക് നല്കാനുള്ള സമയം 14 ദിവസത്തില് നിന്ന് 30 ദിവസമാക്കി.
• കുറ്റവിമുക്തമാക്കല് (Decriminalization): നിസ്സാരമായ സാങ്കേതിക പിഴവുകള്ക്ക് ഇനി തടവുശിക്ഷ ഉണ്ടാകില്ല. പകരം പിഴ (Penalty) മാത്രം.
• ശാരീരിക/മാനസിക അയോഗ്യത: ശാരീരികമായോ മാനസികമായോ വാഹനം ഓടിക്കാൻ അയോഗ്യരായവർ വാഹനം ഓടിച്ചാല് മുമ്പ് ക്രിമിനല് ശിക്ഷയായിരുന്നു. ഇനി ഇത് സിവില് പെനാല്റ്റിയുടെ പരിധിയില് വരും.
• ആദ്യത്തെ ലംഘനത്തിന് മുന്നറിയിപ്പ്: ആദ്യമായി നടത്തുന്ന ചില നിസ്സാര നിയമലംഘനങ്ങള്ക്ക് പിഴക്ക് പകരം ഔദ്യോഗിക
‘മുന്നറിയിപ്പ്’ (Warning) നല്കാൻ ഉദ്യോഗസ്ഥർക്ക് അധികാരം.
• അപ്പീല് അതോറിറ്റികള്: ആർടിഒ നല്കുന്ന പിഴകള്ക്കെതിരെ കോടതിയില് പോകാതെ തന്നെ പരാതി നല്കാൻ പ്രത്യേക അപ്പീല് അതോറിറ്റികള് വരുന്നു.
• പിഴകളില് 10% വർദ്ധനവ്: ഓരോ മൂന്ന് വർഷം കൂടുമ്പോഴും മോട്ടോർ വാഹന പിഴകളില് പത്ത് ശതമാനം വീതം ഓട്ടോമാറ്റിക് വർദ്ധനവ് ഉണ്ടാകും.
• ഡിജിറ്റല് രേഖകള്: ഡിജി ലോക്കർ, എം-പരിവാഹൻ എന്നിവയിലുള്ള രേഖകള് ഒറിജിനലിന് തുല്യമായി പരിഗണിക്കും.
• ഓണ്ലൈൻ വിലാസം മാറ്റം: ആധാർ വെരിഫിക്കേഷൻ വഴി ഓണ്ലൈനായി തന്നെ ലൈസൻസിലും ആർസിയിലും വിലാസം മാറ്റാം.
• സമ്പർക്കരഹിത സേവനങ്ങള് (Contactless): ഡ്യൂപ്ലിക്കേറ്റ് ലൈസൻസ്, എൻഒസി തുടങ്ങിയ 18 സേവനങ്ങള്ക്ക് ആർടിഒ സന്ദർശനം വേണ്ട.
• ഓണ്ലൈൻ മെഡിക്കല് സർട്ടിഫിക്കറ്റ്: ഡോക്ടർമാർക്ക് പരീവാഹൻ സൈറ്റ് വഴി നേരിട്ട് മെഡിക്കല് സർട്ടിഫിക്കറ്റ് അപ്ലോഡ് ചെയ്യാം.
• ഇലക്ട്രിക് വാഹനങ്ങള്ക്ക് മുൻഗണന: ഇലക്ട്രിക് വാഹനങ്ങളുടെ രജിസ്ട്രേഷൻ നടപടികള് കൂടുതല് ലളിതമാക്കി.
• ലൈസൻസ് സസ്പെൻഷൻ: ഒരു വർഷത്തിനുള്ളില് 5 തവണയിലധികം ട്രാഫിക് നിയമങ്ങള് ലംഘിക്കുന്നവരുടെ ലൈസൻസ് 3 മാസത്തേക്ക് സസ്പെൻഡ് ചെയ്യും (2026 ജനുവരി മുതല് പ്രാബല്യത്തില്).
• ഹിറ്റ് ആൻഡ് റണ് നഷ്ടപരിഹാരം: ഹിറ്റ് ആൻഡ് റണ് കേസുകളില് മരിക്കുന്നവരുടെ കുടുംബത്തിനുള്ള നഷ്ടപരിഹാര തുകയില് വർദ്ധനവ് വരുത്തി.
• ചലാൻ അറിയിപ്പ്: നിയമലംഘനം നടന്നാല് 3 ദിവസത്തിനകം മൊബൈലിലും 15 ദിവസത്തിനകം കത്തുവഴിയും വാഹന ഉടമയെ അറിയിക്കണം.
• പരാതി പരിഹാരം: ട്രാഫിക് ചലാനുകള്ക്കെതിരെയുള്ള പരാതികള് 30 ദിവസത്തിനുള്ളില് തീർപ്പാക്കണം.
• അംഗീകൃത ഡ്രൈവിങ് സെന്ററുകള്: ഇത്തരം സെന്ററുകളില് നിന്ന് പരിശീലനം നേടുന്നവർക്ക് ആർടിഒ ടെസ്റ്റ് ഇല്ലാതെ തന്നെ ലൈസൻസ് നല്കുന്ന സംവിധാനം വരുന്നു.
