വിട്ടുമാറാത്ത ചുമയും തുമ്മലും? കാരണം നിങ്ങളുട കിടപ്പുമുറിയിലുണ്ട്‌

നമ്മുടെ ആരോഗ്യവും ശുചിത്വവും നിലനിർത്തുന്നതിൽ കിടപ്പുമുറിയിലെ വൃത്തിക്ക് വലിയ പങ്കുണ്ട്. ഒരു ദിവസത്തിന്റെ മൂന്നിലൊന്ന് ഭാഗവും നമ്മൾ ചിലവഴിക്കുന്നത് കിടക്കയിലാണ്. എന്നാൽ പലപ്പോഴും നമ്മൾ വേണ്ടത്ര ശ്രദ്ധ നൽകാത്ത ഒന്നാണ് ബെഡ്ഷീറ്റുകളുടെയും തലയണ ഉറകളുടെയും ശുചിത്വം. കൃത്യമായ ഇടവേളകളിൽ ഇവ മാറ്റിയില്ലെങ്കിൽ അത് ഗുരുതരമായ ആരോഗ്യപ്രശ്‌നങ്ങൾക്ക് കാരണമായേക്കാം. സാധാരണഗതിയിൽ ആഴ്ചയിലൊരിക്കൽ ബെഡ്ഷീറ്റുകളും തലയണ ഉറകളും മാറ്റുന്നതാണ് ഏറ്റവും ഉചിതം. എന്നാൽ അമിതമായി വിയർക്കുന്നവരോ, വളർത്തുമൃഗങ്ങളെ കിടക്കയിൽ കയറ്റുന്നവരോ ആണെങ്കിൽ ആഴ്ചയിൽ രണ്ടുതവണ മാറ്റുന്നതാണ് നല്ലത്. ദിവസവും ഉപയോഗിക്കുന്ന തലയണ ഉറകൾ രണ്ടു മൂന്ന് ദിവസത്തിലൊരിക്കൽ മാറ്റുന്നത് ചർമ്മത്തിന്റെ സംരക്ഷണത്തിന് ഏറെ സഹായിക്കും. തലയണ ഉറകൾ കൃത്യമായി മാറ്റാതെ ഉപയോഗിക്കുന്നത് ചർമ്മത്തെയും ശ്വസനവ്യവസ്ഥയെയും ഒരുപോലെ ബാധിക്കും. ഉറങ്ങുമ്പോൾ നമ്മുടെ ശരീരത്തിൽ നിന്നും പുറന്തള്ളപ്പെടുന്ന മൃതകോശങ്ങൾ, വിയർപ്പ്, എണ്ണമയം എന്നിവ തലയണ ഉറകളിൽ അടിഞ്ഞുകൂടുന്നു. ഇത് ബാക്ടീരിയകൾക്കും ‘ഡസ്റ്റ് മൈറ്റുകൾ’ എന്ന് വിളിക്കപ്പെടുന്ന പൊടിപടലങ്ങളിൽ വളരുന്ന ജീവികൾക്കും പെരുകാൻ അനുയോജ്യമായ സാഹചര്യം ഒരുക്കുന്നു. മുഖക്കുരുവും മറ്റ് ചർമ്മരോഗങ്ങളും വരാൻ അഴുക്കുള്ള തലയണ ഉറകൾ പ്രധാന കാരണമാണ്. ഉറകളിൽ അടിഞ്ഞുകൂടിയിരിക്കുന്ന എണ്ണമയവും ബാക്ടീരിയകളും മുഖത്തെ സുഷിരങ്ങൾ അടയ്ക്കുന്നതിനും അതുവഴി കടുത്ത മുഖക്കുരു, ചുവന്ന തടിപ്പുകൾ എന്നിവയ്ക്കും കാരണമാകുന്നു. തലമുടിയിലെ എ ണ്ണയും അഴുക്കും തലയണയിൽ പുരളുന്നതുവഴി അത് മുഖത്തെ ചർമ്മത്തിലേക്ക് പടരുകയും ചെയ്യുന്നു. കൂടാതെ, താരൻ വർധിക്കാനും മുടികൊഴിച്ചിലിനും ഇത് ഒരു കാരണമാകാറുണ്ട്. ശ്വാസകോശ സംബന്ധമായ അസുഖങ്ങളുള്ളവർക്ക് വൃത്തിയില്ലാത്ത വിരിപ്പുകൾ വലിയ ഭീഷണിയാണ്. ആസ്ത്മ, സൈനസൈറ്റിസ് (Sinusitis), അലർജി എന്നിവയുള്ളവർക്ക് പൊടിപടലങ്ങൾ നിറഞ്ഞ തലയണകൾ അസ്വസ്ഥത വർധിപ്പിക്കും. രാത്രിയിൽ വിട്ടുമാറാത്ത തുമ്മൽ, മൂക്കൊലിപ്പ്, ശ്വാസംമുട്ടൽ എന്നിവ അനുഭവപ്പെടുന്നതിന് പലപ്പോഴും കിടക്കയിലെ പൊടി കാരണമാകാറുണ്ട്. കണ്ണിന് ചൊറിച്ചിലും ചുവപ്പും അനുഭവപ്പെടുന്നതും വിരിപ്പുകളിലെ അഴുക്കിന്റെ ലക്ഷണമാകാം. നല്ലൊരു ഉറക്കം ലഭിക്കുന്നതിന് വൃത്തിയുള്ള സാഹചര്യം അനിവാര്യമാണ്. അഴുക്കും ദുർഗന്ധവുമുള്ള വിരിപ്പുകൾ ഉറക്കത്തിന്റെ ഗുണനിലവാരത്തെ ബാധിക്കുകയും മാനസികമായ അസ്വസ്ഥത ഉണ്ടാക്കുകയും ചെയ്യും. അതിനാൽ, ആഴ്ചയിലൊരിക്കലെങ്കിലും വിരിപ്പുകൾ ചൂടുവെള്ളത്തിൽ കഴുകി വെയിലത്തിട്ട് ഉണക്കിയെടുക്കുന്നത് രോഗാണുക്കളെ നശിപ്പിക്കാൻ സഹായിക്കും. ആരോഗ്യകരമായ ജീവിതശൈലിയിൽ ഭക്ഷണത്തിനും വ്യായാമത്തിനുമൊപ്പം തന്നെ പ്രാധാന്യം നൽകേണ്ട ഒന്നാണ് നാം ഉറങ്ങുന്ന ഇടത്തിന്റെ ശുചിത്വവും.