ട്രെയിനുകളിൽ പ്ലാസ്റ്റിക് കവറിൽ ഭക്ഷണവിതരണം ഒഴിവാക്കണം: ഹൈക്കോടതി
കൊച്ചി : ട്രെയിനുകളിൽ ഭക്ഷണവിതരണത്തിന് പ്ലാസ്റ്റിക് പാക്കറ്റുകൾ ഒഴിവാക്കണമെന്നും പകരം ജൈവവസ്തുക്കൾകൊണ്ട് നിർമിച്ച പാക്കറ്റുകൾ ഉപയോഗിക്കുന്നതാണ് ഉചിതമെന്നും ഹൈക്കോടതി. ഇക്കാര്യം ഐആർസിടിസി പരിഗണിക്കണമെന്നും സംസ്ഥാനത്തെ മാലിന്യപ്രശ്നങ്ങളുമായി ബന്ധപ്പെട്ട് സ്വമേധയാ എടുത്ത ഹർജി പരിഗണിക്കവെ കോടതി പറഞ്ഞു.
ട്രാക്കുകളിലെ മാലിന്യം ഉടൻ നീക്കണം. വന്ദേഭാരത് അടക്കമുള്ള ട്രെയിനുകളിൽ വലിയതോതിൽ പ്ലാസ്റ്റിക്മാലിന്യം കൂടുകയാണ്. ലഘുഭക്ഷണങ്ങളും മറ്റും വിതരണം ചെയ്യുന്ന കരാറുകാർ ജൈവകവറുകൾമാത്രം ഉപയോഗിക്കാൻ റെയിൽവേ അതോറിറ്റി നിർദേശം നൽകണമെന്ന് ജസ്റ്റിസ് ബെച്ചു കുര്യൻ തോമസ്, ജസ്റ്റിസ് പി ഗോപിനാഥ് എന്നിവരുൾപ്പെട്ട ഡിവിഷൻബെഞ്ച് പറഞ്ഞു. വലിയ അളവിൽ സാധനങ്ങൾ വാങ്ങുന്ന സ്ഥാപനം എന്ന നിലയിൽ ഐആർസിടിസിക്ക് ഇത്തരം നിബന്ധനകൾ വയ്ക്കാൻ കഴിയുമെന്നും കോടതി പറഞ്ഞു.
