പഴയ ഫോൺ വിൽക്കുന്നോ? ഈ കാര്യങ്ങൾ ചെയ്തില്ലെങ്കിൽ പണി കിട്ടും
ന്യൂഡല്ഹി: പുതിയ സ്മാർട്ട്ഫോൺ വാങ്ങുമ്പോൾ പഴയ ഫോൺ വിൽക്കുന്നതോ, എക്സ്ചേഞ്ച് ചെയ്യുന്നതോ, ബന്ധുക്കൾക്ക് നൽകുന്നതോ സാധാരണമാണ്. എന്നാൽ, ഫോൺ കൈമാറുന്നതിന് മുൻപ് ചില അത്യാവശ്യ കാര്യങ്ങൾ ശ്രദ്ധിച്ചില്ലെങ്കിൽ നിങ്ങളുടെ സ്വകാര്യ ഫോട്ടോകൾ, ബാങ്കിംഗ് വിവരങ്ങൾ, പാസ്വേഡുകൾ, സുപ്രധാന രേഖകൾ എന്നിവ മറ്റുള്ളവരുടെ കൈകളിലെത്താൻ സാധ്യതയുണ്ട്. സൈബർ സുരക്ഷ ഉറപ്പാക്കാനും ഫോണിന് മികച്ച റീസെയിൽ വാല്യു ലഭിക്കാനും ഫോൺ കൈമാറുന്നതിന് മുൻപ് ചെയ്യേണ്ട പ്രധാന കാര്യങ്ങൾ താഴെ പറയുന്നവയാണ്. വ്യക്തിഗത വിവരങ്ങൾ ബാക്കപ്പ് ചെയ്യുക. ഫോണിലുള്ള കോൺടാക്റ്റുകൾ, ഫോട്ടോകൾ, വീഡിയോകൾ, വാട്സ്ആപ്പ് ചാറ്റുകൾ, ഫയലുകള് എന്നിവ നഷ്ടപ്പെടാതിരിക്കാൻ ഗൂഗിൾ ഡ്രൈവ് (Google Drive), ഐക്ലൗഡ് (iCloud) അല്ലെങ്കിൽ കമ്പ്യൂട്ടർ എന്നിവയിലേക്ക് പൂർണ്ണമായി ബാക്കപ്പ് ചെയ്യുക. അക്കൗണ്ടുകളിൽ നിന്ന് സൈൻ ഔട്ട് ചെയ്യുക. ഫോൺ റീസെറ്റ് ചെയ്യുന്നതിന് മുൻപ് ആൻഡ്രോയിഡ് ഫോണുകളിൽ നിന്ന് ഗൂഗിൾ അക്കൗണ്ടും ഐഫോണുകളിൽ നിന്ന് ആപ്പിൾ ഐഡിയും (Apple ID) നീക്കം ചെയ്യുക. ഇത് ചെയ്തില്ലെങ്കിൽ, പുതിയ ഉടമയ്ക്ക് ആക്റ്റിവേഷൻ ലോക്ക് അല്ലെങ്കിൽ ഫാക്ടറി റീസെറ്റ് പ്രൊട്ടക്ഷൻ കാരണം ഫോൺ ഉപയോഗിക്കാൻ ബുദ്ധിമുട്ടുണ്ടാകും. ‘ഫൈൻഡ് മൈ ഡിവൈസ്’ ഓഫ് ചെയ്യുക. ഫോൺ നഷ്ടപ്പെട്ടാൽ കണ്ടെത്താൻ സഹായിക്കുന്ന Find My Device (ആൻഡ്രോയിഡ്) അല്ലെങ്കിൽ Find My iPhone (ഐഒഎസ്) ഫീച്ചറുകൾ ഫോൺ കൈമാറുന്നതിന് മുൻപ് ഡിസേബിൾ ചെയ്യുക. ഫാക്ടറി റീസെറ്റ് ചെയ്യുക. ബാക്കപ്പും ലോഗ് ഔട്ടും പൂർത്തിയായ ശേഷം ഫോൺ Factory Reset ചെയ്യുക. ഇത് ഫോണിലെ എല്ലാ ആപ്പുകളും മെസ്സേജുകളും ക്രമീകരണങ്ങളും പൂർണ്ണമായി മായിച്ചുകളഞ്ഞ് ആദ്യം എങ്ങനെയാണോ ഫോണ് ലഭിച്ചത് അതുപോലെയാക്കും. റീസെറ്റിന് ശേഷം ഫോണിലേക്ക് വീണ്ടും വിവരങ്ങൾ ബാക്കപ്പ് ചെയ്യാതിരിക്കാൻ ശ്രദ്ധിക്കുകയും വേണം. സിം കാർഡും ഇ-സിമ്മും നീക്കം ചെയ്യുക. സിം കാർഡ് ഫോണിൽ നിന്ന് ഊരിയെടുക്കുക. ഇനി ഫോണിൽ ഇ-സിം ആണ് ഉപയോഗിക്കുന്നതെങ്കിൽ, അതിന്റെ പ്രൊഫൈൽ ഡിലീറ്റ് ചെയ്യുക. ഫോൺ വൃത്തിയാക്കുക. മൈക്രോഫൈബർ തുണി ഉപയോഗിച്ച് ഫോണിന്റെ ബോഡി, ഡിസ്പ്ലേ, ക്യാമറ ലെൻസ് എന്നിവ വൃത്തിയാക്കുക. ചാർജിംഗ് പോർട്ടിലും സ്പീക്കർ ഗ്രില്ലിലും അടിഞ്ഞുകൂടിയ പൊടിപടലങ്ങൾ മാറ്റുക. വൃത്തിയുള്ള ഒരു ഫോൺ വാങ്ങുന്നയാൾക്ക് നല്ലൊരു ഇംപ്രഷൻ നൽകുകയും മികച്ച വില ലഭിക്കാൻ സഹായിക്കുകയും ചെയ്യും. ബോക്സും അനുബന്ധ സാമഗ്രികളും നൽകുക. ഫോണിന്റെ ഒറിജിനൽ ചാർജർ, യുഎസ്ബി കേബിൾ, ബോക്സ്, വാങ്ങിയതിന്റെ ബിൽ എന്നിവ ലഭ്യമാണെങ്കിൽ വിൽപ്പനയ്ക്കൊപ്പം ഉൾപ്പെടുത്തുക. പൂർണ്ണമായ പാക്കേജ് ലഭ്യമാണെങ്കിൽ ഉപഭോക്താക്കൾ കൂടുതൽ വില നൽകാൻ തയ്യാറാകും. ബാറ്ററിയുടെയും ഫോണിന്റെയും അവസ്ഥ തുറന്നുപറയുക. ഫോണിന്റെ ബാറ്ററി ഹെൽത്ത് പരിശോധിക്കുക. ഫോണിലുള്ള സ്ക്രാച്ചുകൾ, മുൻപ് നടത്തിയിട്ടുള്ള റിപ്പയറുകൾ, ബാറ്ററി ലൈഫ് എന്നിവയെക്കുറിച്ച് വാങ്ങുന്ന ആളോട് സുതാര്യമായി പറയുക. ഇത് ഇടപാടുകാരനുമായുള്ള വിശ്വാസ്യത വർദ്ധിപ്പിക്കും. അതേസമയം ഗൂഗിള് പോ പോലുള്ള യുപിഐ ആപ്പുകള് സൈന് ഔട്ട് ചെയ്യാന് പ്രത്യേകം ഓര്മിക്കുകയും വേണം.
