6 വർഷം ഒരു രൂപ പോലും വാടക നൽകിയില്ല; പാലക്കാട് വനിതാ പൊലീസ് സ്റ്റേഷന് കുടിയൊഴിപ്പിക്കൽ നോട്ടീസ് നൽകി നഗരസഭ

പാലക്കാട്: വാടക കുടിശ്ശിക വരുത്തിയ വനിതാ പൊലീസ് സ്റ്റേഷന് നഗര സഭ കുടിയൊഴിപ്പിക്കൽ നോട്ടീസ് നൽകി. മൂന്ന് ദിവസത്തിനകം ഒഴിയണമെന്നാണ് നോട്ടീസിൽ പറയുന്നത്. 6 വർഷമായി വാടക നൽകുന്നില്ലെന്ന് കാണിച്ചാണ് നോട്ടീസ് നൽകിയിരിക്കുന്നത്. 31 ലക്ഷം രൂപയാണ് വാടകയിനത്തിൽ നഗരസഭക്ക് നൽകാനുള്ളത്. സ്റ്റേഷൻ പ്രവർത്തനം ആരംഭിച്ച് നാളിതുവരെ ഒരു രൂപപോലും വാടക നൽകിയിട്ടില്ലെന്നാണ് ആരോപണം. നോട്ടീസ് ലഭിച്ചതിന്‍റെ പശ്ചാത്തലത്തിൽ 6 മാസം കൂടി സാവകാശം നൽകണമെന്ന് എസ്.പി ആവശ്യപ്പെട്ടു. പരാതി എഴുതി നൽകിയാൽ സാവകാശം അനുവദിക്കാമെന്നും എന്നിട്ടും കുടിശ്ശിക അടച്ചില്ലെങ്കിൽ നടപടിയെടുക്കുമെന്നും നഗര സഭ വ്യക്തമാക്കി. നിലവിൽ ഒട്ടേറെ സ്ഥാപനങ്ങൾ ഇത്തരത്തിൽ കുടിശ്ശിക വരുത്തിയത് നഗരസഭയെ പ്രതിസന്ധിയിലാക്കിയിരിക്കുകയാണ്.