നാദാപുരം : വളയത്ത് പെട്രോൾ പമ്പിൽ സ്കൂട്ടറിന് തീപിടിച്ചു
നാദാപുരം : വളയത്ത് പെട്രോൾ പമ്പിൽ ഇന്ധനം നിറയ്ക്കുന്നതിനിടെ സ്കൂട്ടറിന് തീപിടിച്ചു. ഇന്നലെ രാത്രിയായിരുന്നു സംഭവം.
പമ്പ് ജീവനക്കാരുടെ സമയോചിതമായ ഇടപെടലിനെ തുടർന്ന് തീ നിയന്ത്രണവിധേയമാക്കിയതിനാൽ വൻ അപകടം ഒഴിവായി.സ്കൂട്ടറിൽ ഇന്ധനം നിറയ്ക്കുന്നതിനിടെ ചോർച്ച ശ്രദ്ധയിൽപ്പെട്ടിരുന്നു. തുടർന്ന് വാഹനം സ്റ്റാർട്ട് ചെയ്തതോടെയാണ് തീ പടർന്നത്. തീപിടിത്തമുണ്ടാകുമ്പോൾ പമ്പിൽ മറ്റു വാഹനങ്ങളും ഉണ്ടായിരുന്നതിനാൽ അപകടസാധ്യത ഏറെയായിരുന്നു.
എന്നാൽ പമ്പ് ജീവനക്കാരുടെ ഇടപെടലിലൂടെ തീ പെട്ടെന്ന് നിയന്ത്രണവിധേയമാക്കുകയും കൂടുതൽ സ്ഥലങ്ങളിലേക്ക് പടരുന്നത് തടയുകയും ചെയ്തു. സംഭവത്തിൽ ആർക്കും പരിക്കേറ്റിട്ടില്ല.പെട്രോൾ പമ്പിലെ സി.സി.ടി.വി. ക്യാമറയിൽ തീപിടിത്തത്തിന്റെ ദൃശ്യങ്ങൾ പതിഞ്ഞിട്ടുണ്ട്.
