പേരാമ്പ്രയിലെ ക്ഷേത്രത്തിൽ വൻ മോഷണം; സ്വർണാഭരണങ്ങളും പണവും നിലവിളക്കുകളും കവർന്നു
പേരാമ്പ്ര: പേരാമ്പ്ര ചേനോളി കണ്ണമ്പത്ത് പാറ കരിയാത്തൻ ക്ഷേത്രത്തിൽ വൻ മോഷണം. 15 ലക്ഷത്തോളം രൂപയുടെ സാധനങ്ങളും പണവും മോഷണം പോയി. ചൊവ്വാഴ്ച രാത്രിയാണ് സംഭവം.
ശ്രീകോവിലിന്റെ പൂട്ട് തകർത്താണ് മോഷണം നടന്നത്. പ്രതിഷ്ടയ്ക്ക് ചാർത്തുന്ന സ്വർണാഭരണങ്ങൾ, 75 കിലോയോളം തൂക്കം വരുന്ന ദീപസ്തംഭം, നിലവിളക്കുകൾ, ചിരാതുകൾ, താലം, കിണ്ടി, ഓട്ടുരുളി തുടങ്ങിയ സാധനങ്ങളും കാണിക്കപ്പണമായ 25000 രൂപ ഉൾപ്പടെയാണ് മോഷണം പോയത്. ഇന്നലെ വിളക്ക് വയ്ക്കാനെത്തിയപ്പോഴാണ് മോഷണം നടന്നത് ശ്രദ്ധയിൽപ്പെടുന്നത്. തുടർന്ന് ക്ഷേത്രം ഭാരവാഹികളെയും പോലസിനെയും വിവരം അറിയിക്കുകയായിരുന്നു.
പേരാമ്പ്ര പോലീസും ഡോഗ് സ്‌ക്വാഡും ഫിംഗർപ്രിന്റ് വിദഗ്ധരും സ്ഥലത്തെത്തി പരിശോധന നടത്തി.
