രണ്ടാഴ്ച മുമ്പ് നായുടെ നഖം കൊണ്ട് മുറിവേറ്റു; പനി ബാധിച്ച് ആശുപത്രിയിലെത്തിയ വയോധികൻ പേവിഷബാധയേറ്റ് മരിച്ചു

ചെങ്ങന്നൂർ: പനിക്ക് വിവിധ ആശുപത്രികളിൽ ചികിത്സതേടിയതിന്​ പിന്നാലെ പേവിഷബാധയാണെന്ന്​ സ്ഥിരീകരിച്ച വയോധികൻ മരിച്ചു. തിരുവൻവണ്ടൂർ ഗ്രാമ പഞ്ചായത്ത് അഞ്ചാംവാർഡിൽ ശങ്കരമംഗലത്ത് ഗോപിനാഥൻ നായർ (66) ആണ്​ മരിച്ചത്​. വ്യാഴാഴ്ച പുലർച്ച രണ്ടിന്​ കോട്ടയം മെഡിക്കൽ കോളജ് ആശുപത്രിയിലായിരുന്നു മരണം. തിരുവല്ല വലിയ അമ്പലത്തിനു സമീപം കപ്പലണ്ടി കച്ചവടമായിരുന്നു തൊഴിൽ. രണ്ടാഴ്ച മുമ്പ് തിരുവൻവണ്ടൂർ മിൽമ സൊസൈറ്റി പടിക്ക് സമീപത്തുവെച്ച്​ നായുടെ നഖം കൊണ്ട് മുറിവേറ്റിരുന്നു. സൈക്കിളിൽ പോകവെ നായ പിന്നാലെ ഓടിയെത്തിയപ്പോൾ മറിഞ്ഞ്​ വീഴുകയായിരുന്നു. ഈ സമയത്താണ്​ നഖം കൊണ്ടത്​. പിന്നീട്​ അസ്വസ്ഥത അനുഭവപ്പെട്ടതോടെ ആദ്യം ഇരമല്ലിക്കര പ്രാഥമിക ആരോഗ്യകേന്ദ്രത്തിൽ ചികിത്സ തേടിയപ്പോൾ പനിക്കുള്ള മരുന്ന്​ മാത്രമാണ് നൽകിയത്. സമീപത്തെ സ്വകാര്യ ആശുപത്രിയിലും ചെങ്ങന്നൂർ ജില്ല ആശുപത്രിയിലും ചികിത്സ തേടിയെങ്കിലും പേവിഷബാധ കണ്ടെത്തിയിരുന്നില്ല. പിന്നീട്​ ആരോഗ്യനില മോശമായതോടെ തിരുവല്ല മെഡിക്കൽ മിഷനിൽ പ്രവേശിപ്പിച്ച്​ നടത്തിയ ശ്രവ പരിശോധനയിലാണ് പേവിഷബാധ സ്ഥിരീകരിച്ചത്. തുടർന്ന് തിങ്കളാഴ്ച കോട്ടയം മെഡിക്കൽ കോളജിലെ തീവ്ര പരിചരണ വിഭാഗത്തിലേക്ക്​ മാറ്റുകയായിരുന്നു. ഭാര്യ: ശാന്തമ്മ. മൂത്തമകൾ രഞ്ജിനി ഗോപി അംഗപരിമിതയാണ്. ഇളയമകൾ റെൻജു ഗോപി ജർമനിയിൽ നഴ്​സാണ്​. സംസ്കാരം പിന്നീട്.