കൊല്ലം: ആറ്റിൽ ഒഴുക്കിൽ പെട്ട മകളെയും ബന്ധുവിനെയും രക്ഷിക്കാൻ ശ്രമിക്കുന്നതിനിടെ യുവാവിന് ദാരുണാന്ത്യം. പാങ്ങോട് ഭരതന്നൂർ നെല്ലിക്കുന്ന് വീട്ടിൽ മുഹമ്മദ് ഫൈസൽ (31) ആണ് മുങ്ങിമരിച്ചത്. ബുധനാഴ്ച ഉച്ചയോടെ കുളത്തൂപ്പുഴ ചോഴിയക്കോട് മീൽപാലത്തിന് സമീപം കല്ലടയാറ്റിലായിരുന്നു അപകടം.
ബന്ധുക്കൾക്കൊപ്പം കുളിക്കാനെത്തിയതായിരുന്നു. ഒഴുക്കിൽപ്പെട്ട മറ്റുള്ളവരെ നാട്ടുകാർ രക്ഷപ്പെടുത്തിയെങ്കിലും ഫൈസൽ കയത്തിൽ അകപ്പെടുകയായിരുന്നു. പരിസരവാസികളായ യുവാക്കൾ ഏറെ പരിശ്രമിച്ച് ഫൈസലിനെ കരയ്‌ക്കെടുത്ത് കുളത്തൂപ്പുഴ ആശുപത്രിയിൽ എത്തിച്ചപ്പോഴേക്കും വൈകിപോയി. ഡോക്ടർമാർ മരണം സ്ഥിരീകരിച്ചു. ഒഴുക്കിൽപെട്ട കുട്ടി അപകട നില തരണം ചെയ്തിട്ടുണ്ട്.
