രാത്രി വൈകിയും ഉറങ്ങുന്നവരാണോ? നേരത്തെ മരിക്കാനുള്ള സാധ്യത കൂടുതലെന്ന് പഠനം; പക്ഷേ കാരണം ഉറക്കസമയം മാത്രമല്ല

രാത്രി വൈകി ഉറങ്ങുകയും രാവിലെ വൈകി എഴുന്നേൽക്കുകയും ചെയ്യുന്ന ശീലം പലർക്കുമുണ്ട്. എന്നാൽ ഇത്തരക്കാരിൽ നേരത്തെയുള്ള മരണസാധ്യത അൽപം കൂടുതലായേക്കാമെന്ന് ഒരു ദീർഘകാല പഠനം. ‘നൈറ്റ് ഓൾ’ എന്ന് വിശേഷിപ്പിക്കപ്പെടുന്ന ഇത്തരം ആളുകളിൽ മരണസാധ്യത രാവിലെ നേരത്തെ ഉണരുന്നവരേക്കാൾ ഏകദേശം ഒൻപത് ശതമാനം കൂടുതലാണെന്നാണ് ഫിൻലൻഡിൽ നടത്തിയ പഠനത്തിലെ കണ്ടെത്തൽ. എന്നാൽ ഇതിന് കാരണം രാത്രി വൈകി ഉറങ്ങുന്ന ശീലം മാത്രമാണെന്ന് പഠനം പറയുന്നില്ല. പുകവലി, മദ്യപാനം തുടങ്ങിയ ജീവിതശൈലി ഘടകങ്ങൾക്കാണ് പ്രധാന പങ്കെന്ന് ഗവേഷകർ ചൂണ്ടിക്കാട്ടുന്നു. ഫിന്നിഷ് ട്വിൻ കോഹോർട്ട് പഠനത്തിന്റെ ഭാഗമായാണ് ഗവേഷകർ ഈ വിഷയം പരിശോധിച്ചത്. 1981ൽ ആരംഭിച്ച പഠനത്തിൽ 23,854 ഇരട്ടകളുടെ വിവരങ്ങളാണ് ഉൾപ്പെടുത്തിയിരുന്നത്. ഇവരിൽ നിന്നുള്ള മരണരേഖകൾ 2018 വരെ പരിശോധിച്ചു. 8,728 പേരുടെ മരണവിവരങ്ങൾ വിശദമായി വിശകലനം ചെയ്താണ് പുതിയ കണ്ടെത്തലിലേക്ക് ഗവേഷകർ എത്തിയത്. വിദ്യാഭ്യാസം, മദ്യപാനം, പുകവലി, ശരീരഭാരം, ഉറക്കത്തിന്റെ ദൈർഘ്യം തുടങ്ങിയ ഘടകങ്ങളും കണക്കിലെടുത്തായിരുന്നു പഠനം. പഠനത്തിന്റെ തുടക്കത്തിൽ പങ്കെടുത്തവരോട് തങ്ങൾ രാവിലെ ഉണരാൻ ഇഷ്ടപ്പെടുന്നവരാണോ രാത്രിയിൽ സജീവരാകുന്നവരാണോ എന്നതിനെക്കുറിച്ച് ചോദിച്ചിരുന്നു. വ്യക്തമായി ‘morning person’ എന്ന് പറഞ്ഞവർക്ക് പുറമെ ‘somewhat morning’ വിഭാഗവും ഉണ്ടായിരുന്നു. അതുപോലെ തന്നെ വ്യക്തമായി രാത്രി സ്വഭാവമുള്ളവരും രാത്രിയോട് നേരിയ താൽപര്യമുള്ളവരുമുണ്ടായിരുന്നു. ‘രാത്രി വൈകി ഉറങ്ങുന്നു’ എന്നത് മാത്രം പ്രശ്നമല്ല പഠനത്തിലെ ഏറ്റവും പ്രധാനപ്പെട്ട കണ്ടെത്തലുകളിലൊന്ന് ഇതാണ്. ‘Evening type’ ആളുകളിൽ കണ്ട അധിക മരണസാധ്യതയുടെ വലിയൊരു ഭാഗം പുകവലിയും മദ്യപാനവും പോലുള്ള ശീലങ്ങളുമായി ബന്ധപ്പെട്ടതായിരുന്നു. ഈ ഘടകങ്ങൾ കണക്കിലെടുത്തപ്പോൾ അപകടസാധ്യതയുടെ വ്യത്യാസം ഗണ്യമായി കുറഞ്ഞു. പുകവലിക്കാത്തവരും വളരെ കുറച്ച് മദ്യം മാത്രം ഉപയോഗിക്കുന്നവരുമായ evening-type ആളുകളിൽ മരണസാധ്യത വർധിച്ചതായി കണ്ടെത്തിയില്ല. അതായത്, രാത്രി 12 മണിക്ക് ശേഷം ഉറങ്ങുന്ന എല്ലാവരും നേരത്തെ മരിക്കും എന്നല്ല പഠനത്തിന്റെ അർഥം. ഉറക്കസമയത്തോടൊപ്പം ആ വ്യക്തിയുടെ ജീവിതശൈലി, ഉറക്കത്തിന്റെ ഗുണനിലവാരം, ഉറക്കക്കുറവ്, പുകവലി, മദ്യപാനം തുടങ്ങിയവയും ആരോഗ്യത്തിൽ നിർണായകമാണ്. എന്താണ് ‘സ്ലീപ്പ് ക്രോണോടൈപ്പ്’? ഓരോരുത്തരുടെയും ശരീരത്തിനുള്ളിൽ ഏകദേശം 24 മണിക്കൂർ ദൈർഘ്യമുള്ള ഒരു ജൈവഘടികാരമുണ്ട്. ഇതാണ് സർക്കേഡിയൻ റിഥം. ഉറക്കം, ഉണർച്ച, ഹോർമോൺ ഉൽപാദനം, ശരീര താപനില തുടങ്ങിയ നിരവധി പ്രവർത്തനങ്ങളെ ഇത് നിയന്ത്രിക്കുന്നു. ഇതനുസരിച്ച് ചിലർ സ്വാഭാവികമായി രാവിലെ നേരത്തെ ഉണർന്ന് കൂടുതൽ സജീവരാകും. ഇവരെ ‘morning chronotype’ എന്ന് വിളിക്കുന്നു. ചിലർക്ക് വൈകുന്നേരവും രാത്രിയുമാണ് കൂടുതൽ ഊർജസ്വലമായ സമയം. ഇവരാണ് ‘evening chronotype’ അഥവാ ‘night owls’. ഇത് വെറും ശീലമല്ല; ജനിതക ഘടകങ്ങൾ ഉൾപ്പെടെ പല കാര്യങ്ങളും ഒരാളുടെ ക്രോണോടൈപ്പിനെ സ്വാധീനിക്കുന്നതായി ഗവേഷണങ്ങൾ സൂചിപ്പിക്കുന്നു. രാത്രി ഉണർന്നിരിക്കുന്നതിന്റെ ആരോഗ്യബന്ധം എന്ത്? രാത്രി സ്വഭാവമുള്ളവരിൽ ചില ആരോഗ്യപ്രശ്നങ്ങൾ കൂടുതലായി കാണപ്പെടാമെന്ന് മുൻ പഠനങ്ങളും സൂചിപ്പിച്ചിട്ടുണ്ട്. 3.7 ലക്ഷത്തിലധികം ആളുകളെ ഉൾപ്പെടുത്തി നടത്തിയ ഒരു മെറ്റാ-അനാലിസിസിൽ evening chronotype ഉള്ളവരിൽ രക്തത്തിലെ പഞ്ചസാര, എൽഡിഎൽ കൊളസ്ട്രോൾ, ട്രൈഗ്ലിസറൈഡുകൾ തുടങ്ങിയ ചില കാർഡിയോമെറ്റബോളിക് സൂചകങ്ങൾ കൂടുതലായി കാണപ്പെട്ടിരുന്നു. ടൈപ്പ് 2 പ്രമേഹവുമായി ബന്ധവും കണ്ടെത്തിയിട്ടുണ്ട്. എന്നാൽ ഇത്തരം പഠനങ്ങൾ പ്രധാനമായും ബന്ധം കാണിക്കുന്നവയാണ്; രാത്രി വൈകി ഉറങ്ങുന്നതാണ് നേരിട്ട് ഈ രോഗങ്ങൾക്ക് കാരണമാകുന്നതെന്ന് തെളിയിക്കുന്നില്ല. രാത്രി വൈകി ഉറങ്ങുന്ന ഒരാൾക്ക് രാവിലെ ജോലി, പഠനം തുടങ്ങിയ ആവശ്യങ്ങൾക്കായി നേരത്തെ എഴുന്നേൽക്കേണ്ടിവന്നാൽ ഉറക്കദൈർഘ്യം കുറയാനും സാധ്യതയുണ്ട്. ഇത്തരത്തിലുള്ള സോഷ്യൽ ജെറ്റ് ലാഗ് ശരീരത്തിന്റെ സ്വാഭാവിക ജൈവഘടികാരവും സാമൂഹിക സമയക്രമവും തമ്മിൽ പൊരുത്തക്കേട് ഉണ്ടാക്കാം. ഉറക്കത്തിന്റെ ദൈർഘ്യത്തോടൊപ്പം ഉറങ്ങുകയും എഴുന്നേൽക്കുകയും ചെയ്യുന്ന സമയത്തിലെ സ്ഥിരതയും ആരോഗ്യത്തിന് പ്രധാനമാണെന്ന് ഗവേഷണങ്ങൾ ചൂണ്ടിക്കാണിക്കുന്നു. ഹൃദയാരോഗ്യത്തിലും ശ്രദ്ധ വേണം 2026ൽ പ്രസിദ്ധീകരിച്ച മറ്റൊരു വലിയ പഠനത്തിൽ മൂന്ന് ലക്ഷത്തിലധികം മുതിർന്നവരുടെ വിവരങ്ങൾ പരിശോധിച്ചപ്പോൾ evening chronotype ഉള്ളവരിൽ ഹൃദയാരോഗ്യവുമായി ബന്ധപ്പെട്ട അപകടസൂചകങ്ങൾ കൂടുതലായി കണ്ടു. ‘Night owls’ വിഭാഗത്തിൽ മോശം മൊത്തത്തിലുള്ള കാർഡിയോവാസ്കുലാർ ഹെൽത്ത് സ്കോർ ലഭിക്കാനുള്ള സാധ്യത കൂടുതലായിരുന്നുവെന്നും ഹൃദയാഘാതം അല്ലെങ്കിൽ സ്ട്രോക്ക് ഉണ്ടാകാനുള്ള സാധ്യതയും ഉയർന്നതായി ഗവേഷകർ റിപ്പോർട്ട് ചെയ്തു. അതേസമയം, സ്വാഭാവികമായി രാത്രി സജീവരാകുന്ന ഒരാൾ എന്നത് രോഗമാണെന്നോ അപകടമാണെന്നോ അർഥമില്ല. ആവശ്യത്തിന് ഉറങ്ങുകയും, സ്ഥിരമായ ഉറക്കക്രമം പാലിക്കുകയും, പുകവലി-അമിത മദ്യപാനം ഒഴിവാക്കുകയും, ആരോഗ്യകരമായ ഭക്ഷണവും വ്യായാമവും ശീലമാക്കുകയും ചെയ്യുന്നവരിൽ ചിത്രം വ്യത്യസ്തമായിരിക്കാം. അപ്പോൾ രാത്രി വൈകി ഉറങ്ങുന്നവർ എന്തുചെയ്യണം? രാത്രി വൈകി ഉറങ്ങുന്ന ശീലമുണ്ടെങ്കിൽ ഒറ്റയടിക്ക് വളരെ നേരത്തെ ഉറങ്ങാൻ ശ്രമിക്കുന്നതിനേക്കാൾ ഉറക്കസമയം ക്രമേണ മുന്നോട്ടുകൊണ്ടുവരുന്നതാണ് പ്രായോഗികം. ദിവസവും ഏകദേശം ഒരേ സമയത്ത് ഉറങ്ങാനും എഴുന്നേൽക്കാനും ശ്രമിക്കുക. മുതിർന്നവർക്ക് സാധാരണയായി 7–9 മണിക്കൂർ ഉറക്കം ലഭിക്കുന്നുണ്ടെന്ന് ഉറപ്പാക്കുക. ഉറങ്ങുന്നതിന് മുമ്പുള്ള സമയത്ത് കഫീൻ, മദ്യം, അമിതമായ ഭക്ഷണം എന്നിവ ഒഴിവാക്കുന്നത് സഹായകരമാണ്. കിടക്കുന്നതിന് മുമ്പ് മൊബൈൽ, ലാപ്‌ടോപ്പ് തുടങ്ങിയവയുടെ ഉപയോഗം കുറയ്ക്കുക. പകൽ സമയത്ത് പ്രകൃതിദത്ത വെളിച്ചം ലഭിക്കുകയും സ്ഥിരമായി വ്യായാമം ചെയ്യുകയും ചെയ്യുക. സ്ഥിരമായി ഉറക്കക്കുറവ്, അമിതമായ പകൽ ഉറക്കം, കൂർക്കംവലി, ഉറക്കത്തിനിടെ ശ്വാസം മുട്ടൽ തുടങ്ങിയ പ്രശ്നങ്ങളുണ്ടെങ്കിൽ ഡോക്ടറുടെ സഹായം തേടുക. രാത്രി-സ്വഭാവമുള്ളവരിൽ ചില ആരോഗ്യഅപകടങ്ങൾ കൂടുതലായി കാണാമെങ്കിലും, അതിന് ഉറക്കസമയം മാത്രം കാരണമല്ല. ജീവിതശൈലി, ഉറക്കത്തിന്റെ ദൈർഘ്യം, ഉറക്കക്രമം, ശരീരത്തിന്റെ ജൈവഘടികാരവുമായി ഉണ്ടാകുന്ന പൊരുത്തക്കേട് എന്നിവയും ഒരുപോലെ പ്രധാനമാണ്.