ഡബിളടിച്ച് ഗിൽ, നൂറടിച്ച് ഹിറ്റ്മാൻ; വിൻഡീസിന്റെ റൺമല അനായാസം മറികടന്ന് ഇന്ത്യ പരമ്പര സ്വന്തമാക്കി

ഗുവാഹത്തി: രണ്ടാം ഏകദിനത്തിൽ വെസ്റ്റ് ഇൻഡീസിന്റെ റൺമല അനായാസം മറികടന്ന് ഇന്ത്യ. ഗുവാഹത്തിയിലെ ബർസാപാര ക്രിക്കറ്റ് സ്റ്റേഡിയത്തിൽ നടന്ന ആവേശകരമായ മത്സരത്തിൽ 8 വിക്കറ്റിനായിരുന്നു ഇന്ത്യയുടെ വിജയം. വിൻഡീസ് ഉയർത്തിയ 406 റൺസ് വിജയലക്ഷ്യം ഇന്ത്യ 43.3 ഓവറിൽ മറികടന്നു.
നായകൻ ശുഭ്മാൻ ഗില്ലും രോഹിത് ശർമ്മയും ചേർന്ന് ഒന്നാം വിക്കറ്റിൽ സ്വപ്നതുല്യമായ തുടക്കമാണ് ഇന്ത്യയ്ക്ക് നൽകിയത്. 26.2 ഓവറിൽ 255 റൺസാണ് ഒന്നാം വിക്കറ്റിൽ ഇരുവരും ചേർന്ന് പടുത്തുയർത്തിയത്. ഗിൽ 132 പന്തിൽ 223 റൺസുമായി പുറത്താകാതെ നിന്നു. 25 ബൗണ്ടറികളും 8 സിക്സറുകളുമടങ്ങുന്നതായിരുന്നു ​ഗില്ലിന്റെ ഇന്നിം​ഗ്സ്. 75 പന്തിൽ 10 ബൗണ്ടറികളും 6 സിക്സറുകളും സഹിതം 101 റൺസ് നേടിയാണ് രോഹിത് മടങ്ങിയത്. 
ഗില്ലിന് ഉറച്ച പിന്തുണ നൽകിയ റിതുരാജ് ഗെയ്ക്വാദ് 31 റൺസുമായി പുറത്താകാതെ നിന്നു. വിരാട് കോഹ്ലി 29 റൺസ് നേടി. ഏകദിന ചരിത്രത്തിലെ ഇന്ത്യയുടെ ഏറ്റവും വലിയ റൺചേസ് വിജയമാണിത്. ജയത്തോടെ ഒരു മത്സരം ബാക്കി നിൽക്കെ പരമ്പര ഇന്ത്യ സ്വന്തമാക്കി.
അതേസമയം, മൂന്ന് ബാറ്റർമാരുടെ സെഞ്ച്വറി മികവിലാണ് വെസ്റ്റ് ഇൻഡീസ് ഇന്ത്യയ്ക്ക് മുന്നിൽ കൂറ്റൻ വിജയലക്ഷ്യം പടുത്തുയർത്തിയത്. ജോൺ കാംപ്ബെല്ലാണ് വിൻഡീസിന്റെ ഇന്നിം​ഗ്സിന് അടിത്തറയിട്ടത്. വെറും 65 പന്തിൽ സെഞ്ച്വറി തികച്ച കാംപ്ബെൽ ഇന്ത്യക്കെതിരെ വെസ്റ്റ് ഇൻഡീസ് താരത്തിന്റെ അതിവേഗ ഏകദിന സെഞ്ച്വറിയെന്ന നേട്ടവും സ്വന്തമാക്കി. കാംപ്ബെൽ 101 റൺസ് നേടിയ ശേഷമാണ് പുറത്തായത്.
ക്യാപ്റ്റൻ ഷായ് ഹോപ്പും തകർപ്പൻ ബാറ്റിം​ഗ് പുറത്തെടുത്തു. ഹോപ് 94 പന്തിൽ 104 റൺസെടുത്തു. പിന്നാലെ അമീർ ജാങ്കൂയും വെടിക്കെട്ട് സെഞ്ച്വറിയുമായി ഇന്ത്യൻ ബൗളർമാരെ സമ്മർദ്ദത്തിലാക്കി. വെറും 70 പന്തിലാണ് ജാങ്കൂ മൂന്നക്കം തികച്ചത്. 77 പന്തിൽ 114 റൺസെടുത്ത ജാങ്കൂവിന്റെ ഇന്നിം​ഗ്സിൽ 13 ബൗണ്ടറികളും 8 സിക്സുകളും ഉൾപ്പെട്ടു.
ഇതോടെ ഒരേ ഇന്നിം​ഗ്സിൽ മൂന്ന് സെഞ്ച്വറികൾ നേടുന്ന അപൂർവ പ്രകടനമാണ് വിൻഡീസ് ബാറ്റർമാർ പുറത്തെടുത്തത്. ആദ്യ ഏകദിനത്തിൽ ഇന്ത്യയുടെ സ്പിന്നർമാർ മധ്യ ഓവറുകളിൽ മത്സരം തിരിച്ചുപിടിച്ചിരുന്നെങ്കിലും രണ്ടാം മത്സരത്തിൽ കാംപ്ബെൽ, ഹോപ്പ്, ജാങ്കൂ കൂട്ടുകെട്ടുകൾ ഇന്ത്യയ്ക്ക് കാര്യമായ അവസരം നൽകിയില്ല.
ഇന്ത്യയ്ക്കായി രവീന്ദ്ര ജഡേജയും കുൽദീപ് യാദവും ​ഗുർനൂർ ബ്രാറും 2 വീതം വിക്കറ്റുകൾ വീഴ്ത്തി. കുൽദീപ് യാദവ് ഏകദിന കരിയറിൽ 200 വിക്കറ്റ് എന്ന നാഴികക്കല്ലും പിന്നിട്ടു. അരങ്ങേറ്റ മത്സരത്തിനിറങ്ങിയ ഔകിബ് നബിക്ക് 8.5 ഓവറിൽ 84 റൺസ് വഴങ്ങിയെങ്കിലും വിക്കറ്റ് നേടാനായില്ല.