ആവണക്കെണ്ണയോ വെളിച്ചെണ്ണയോ? മുടിയുടെ ആരോഗ്യത്തിന് ഏതാണ് മികച്ചത്?

മുടി വളരാനും കൊഴിച്ചിൽ കുറയ്ക്കാനും എണ്ണ തേയ്ക്കുന്ന ശീലം ഇന്നും പലരുടെയും മുടിസംരക്ഷണത്തിന്റെ ഭാഗമാണ്. എന്നാൽ ആവണക്കെണ്ണയും വെളിച്ചെണ്ണയും തമ്മിൽ ഏതാണ് മികച്ചതെന്ന കാര്യത്തിൽ പലർക്കും ആശയക്കുഴപ്പമുണ്ട്. രണ്ടിനും ഗുണങ്ങളുണ്ട്, പക്ഷേ അവയുടെ ഉപയോഗം ഒരുപോലെയല്ല. മുടി വളർച്ചയ്ക്ക് ആവണക്കെണ്ണ തന്നെ? ആവണക്കെണ്ണയിൽ റിസിനോളിക് ആസിഡ് ധാരാളമായി അടങ്ങിയിട്ടുണ്ട്. അതുകൊണ്ട് തന്നെ ഇത് മുടിവളർച്ചയ്ക്ക് സഹായിക്കുമെന്ന പ്രചാരണം വ്യാപകമാണ്. എന്നാൽ ഇവിടെ ഒരു പ്രധാന കാര്യമുണ്ട് ആവണക്കെണ്ണ നേരിട്ട് മുടിവളർച്ച വേഗത്തിലാക്കുന്നു എന്നതിന് ശക്തമായ ക്ലിനിക്കൽ തെളിവുകൾ നിലവിൽ ലഭ്യമല്ല. 2022ലെ ഒരു വ്യവസ്ഥാപിത അവലോകനവും ആവണക്കെണ്ണയിൽ മുടിയുടെ തിളക്കവും ഗുണനിലവാരവും മെച്ചപ്പെടുത്തുന്നതിന് ചില തെളിവുകൾ ഉണ്ടെങ്കിലും, മുടിവളർച്ചയ്ക്കുള്ള ശക്തമായ തെളിവുകൾ ലഭ്യമല്ലെന്ന് ചൂണ്ടിക്കാട്ടുന്നു. വരണ്ടതും പൊട്ടുന്നതുമായ മുടിയാണെങ്കിൽ? ഇവിടെയാണ് വെളിച്ചെണ്ണ കൂടുതൽ ശ്രദ്ധേയമാകുന്നത്. വെളിച്ചെണ്ണയിലെ ലോറിക് ആസിഡിന് മുടിയുടെ തണ്ടിലേക്ക് കടക്കാനുള്ള കഴിവുണ്ട്. ഇതുവഴി മുടിയിൽ നിന്നുള്ള പ്രോട്ടീൻ നഷ്ടം കുറയ്ക്കാനും കഴുകുമ്പോഴും ചീകുമ്പോഴും ഉണ്ടാകുന്ന കേടുപാടുകൾ കുറയ്ക്കാനും ഇത് സഹായിച്ചേക്കാം. അതായത് മുടി വളരുന്നതിനെക്കാൾ മുടിയുള്ളത് സംരക്ഷിക്കുന്നതിലാണ് വെളിച്ചെണ്ണയുടെ ശക്തി. മുടി കൊഴിയുന്നതായി തോന്നുന്നതിന് ഒരു കാരണം പൊട്ടലുമാകാം മുടി വേരിൽ നിന്ന് കൊഴിയുന്നതും മുടിയുടെ നീളം പൊട്ടി കുറയുന്നതും രണ്ടാണ്. എണ്ണ ഉപയോഗിച്ച് മുടിയുടെ തണ്ട് ശക്തമായി സംരക്ഷിക്കാൻ കഴിയുന്നത് പൊട്ടൽ കുറയ്ക്കാൻ സഹായിച്ചേക്കാം. വെളിച്ചെണ്ണ ഉപയോഗിച്ച മുടിയിൽ ഘടനാപരമായ കേടുപാടുകൾ കുറയുന്നതായി ചില പഠനങ്ങൾ കണ്ടെത്തിയിട്ടുണ്ട്. മുടിക്ക് കനം തോന്നിക്കണമെങ്കിൽ? കട്ടിയുള്ള ആവണക്കെണ്ണയിൽ മുടിയിൽ ഒരു പാളി പോലെ തോന്നുന്നതിനാൽ മുടിക്ക് കൂടുതൽ കനവും തിളക്കവും ലഭിച്ചതായി തോന്നാം. എന്നാൽ അത് പുതിയ മുടി വളരുന്നതിന്റെ തെളിവല്ല. ആവണക്കെണ്ണ മുടിയുടെ തിളക്കം മെച്ചപ്പെടുത്താൻ സഹായിക്കാമെന്നതിന് ചില തെളിവുകളുണ്ടെങ്കിലും, മുടിയുടെ വളർച്ച വർധിപ്പിക്കുന്നതായി ഉറപ്പിക്കുന്ന ശക്തമായ പഠനങ്ങൾ ഇപ്പോഴും കുറവാണ്. ഏത് മുടിക്ക് ഏത് എണ്ണ? വളരെ വരണ്ടതും ഫ്രിസ്സിയുമായ മുടി — വെളിച്ചെണ്ണ പരീക്ഷിക്കാം പൊട്ടുന്ന മുടി — വെളിച്ചെണ്ണ കൂടുതൽ പ്രയോജനകരമായേക്കാം കട്ടിയുള്ളതും വരണ്ടതുമായ മുടിയിൽ അധിക കണ്ടീഷനിങ് വേണമെങ്കിൽ — ആവണക്കെണ്ണ ചെറിയ അളവിൽ ഉപയോഗിക്കാം എണ്ണമയമുള്ള തലയോട്ടി — അമിതമായി എണ്ണ പുരട്ടുന്നത് ഒഴിവാക്കുന്നതാണ് നല്ലത് രണ്ടും ഒരുമിച്ച് ഉപയോഗിക്കാമോ? ഉപയോഗിക്കാം. എന്നാൽ കൂടുതൽ എണ്ണ ഉപയോഗിച്ചാൽ കൂടുതൽ മുടി വളരും എന്ന ധാരണ ശരിയല്ല. വെളിച്ചെണ്ണ മുടിയുടെ തണ്ടിന്റെ സംരക്ഷണത്തിനും കണ്ടീഷനിങ്ങിനും ഉപയോഗിക്കാം. ആവണക്കെണ്ണ വളരെ കട്ടിയുള്ളതിനാൽ ചെറിയ അളവിൽ ഉപയോഗിക്കുന്നതാണ് പ്രായോഗികം. ഒടുവിൽ, ഏതാണ് വിജയി? മുടി വേഗത്തിൽ വളരണമെന്ന ലക്ഷ്യമാണെങ്കിൽ ആവണക്കെണ്ണ തന്നെ മികച്ചതാണെന്ന് പറയാൻ ശാസ്ത്രീയ തെളിവില്ല. മുടിയുടെ പൊട്ടൽ കുറയ്ക്കാനും മുടിയുടെ തണ്ട് സംരക്ഷിക്കാനും ആഗ്രഹിക്കുന്നുവെങ്കിൽ വെളിച്ചെണ്ണയ്ക്കാണ് താരതമ്യേന മികച്ച തെളിവുകളുള്ളത്. അതുകൊണ്ട് മുടികൊഴിച്ചിൽ പെട്ടെന്ന് കൂടുകയോ കഷണ്ടിപ്പാടുകൾ രൂപപ്പെടുകയോ ചെയ്യുന്നുണ്ടെങ്കിൽ എണ്ണമാറ്റുന്നതിൽ മാത്രം ശ്രദ്ധ കേന്ദ്രീകരിക്കാതെ കാരണം കണ്ടെത്തുന്നതാണ് കൂടുതൽ പ്രധാനപ്പെട്ടത്.