വ്യാജ ക്ലെയിമുകൾക്ക് കടിഞ്ഞാൺ; ഇൻഷുറൻസ് പരിശോധന കർശനമാക്കാൻ കമ്പനികൾ, പ്രീമിയം കൂട്ടിയേക്കും

വാഹനാപകടങ്ങളുമായി ബന്ധപ്പെട്ട തേർഡ് പാർട്ടി ഇൻഷുറൻസ് ക്ലെയിമുകളിൽ വർധിച്ചുവരുന്ന തട്ടിപ്പുകൾ തടയാൻ ഇൻഷുറൻസ് കമ്പനികൾ കർശന നടപടികളിലേക്ക്. വ്യാജ ക്ലെയിമുകളുടെ വർധന, ഇൻഷുറൻസ് ഇല്ലാതെ നിരത്തിലിറങ്ങുന്ന വാഹനങ്ങളുടെ എണ്ണം, കോടതികൾ അനുവദിക്കുന്ന ഉയർന്ന നഷ്ടപരിഹാര തുക എന്നിവ ഇൻഷുറൻസ് മേഖലയ്ക്ക് വലിയ സാമ്പത്തിക ബാധ്യത സൃഷ്ടിക്കുന്ന സാഹചര്യത്തിലാണ് പരിശോധന ശക്തമാക്കാനുള്ള തീരുമാനം.
വ്യാജ ക്ലെയിമുകൾ നിയന്ത്രണവിധേയമാക്കാനായില്ലെങ്കിൽ ഭാവിയിൽ സാധാരണ വാഹന ഉടമകൾക്കും ഇൻഷുറൻസ് പ്രീമിയം വർധനയുടെ ഭാരം ഏറ്റുവാങ്ങേണ്ടിവരാമെന്ന ആശങ്കയും ഉയരുന്നുണ്ട്.

ഇൻഷുറൻസ് കമ്പനികൾക്ക് ഇരട്ട വെല്ലുവിളി

മോട്ടോർ തേർഡ് പാർട്ടി ഇൻഷുറൻസ് വിഭാഗം ഇതിനകം തന്നെ സാമ്പത്തിക സമ്മർദം നേരിടുന്ന സാഹചര്യത്തിലാണ് വ്യാജ ക്ലെയിമുകൾ കൂടുതൽ വെല്ലുവിളിയാകുന്നതെന്ന് ഇൻഷുറൻസ് മേഖലയിലെ വിദഗ്ധർ ചൂണ്ടിക്കാട്ടുന്നു.

ഇന്ത്യയിൽ എല്ലാ വാഹനങ്ങൾക്കും തേർഡ് പാർട്ടി ഇൻഷുറൻസ് നിർബന്ധമാണ്. അപകടങ്ങളിൽ മൂന്നാം കക്ഷിക്ക് പരിക്കേൽക്കുകയോ മരണം സംഭവിക്കുകയോ ചെയ്താൽ നഷ്ടപരിഹാരം നൽകേണ്ടത് ഇൻഷുറൻസ് കമ്പനികളാണ്. എന്നാൽ വ്യാജരേഖകളും കെട്ടിച്ചമച്ച അപകടവിവരങ്ങളും ഉപയോഗിച്ചുള്ള ക്ലെയിമുകൾ കമ്പനികളുടെ സാമ്പത്തിക ബാധ്യത ഗണ്യമായി വർധിപ്പിക്കുകയാണ്.

സുപ്രീം കോടതി വിധിയും ബാധ്യത കൂട്ടി

അപകടങ്ങളിൽ കുടുംബാംഗങ്ങളുടെ ഗാർഹിക പരിചരണം നഷ്ടപ്പെടുന്നതിനുള്ള നഷ്ടപരിഹാരം പ്രത്യേകം നൽകണമെന്ന സുപ്രീം കോടതി വിധിയും ഇൻഷുറൻസ് കമ്പനികളുടെ ബാധ്യത വർധിപ്പിച്ചിട്ടുണ്ട്.

പുതിയ മാർഗനിർദേശപ്രകാരം, ഗാർഹിക പരിചരണത്തിന്റെ മൂല്യം കണക്കാക്കാൻ പ്രതിമാസം 30,000 രൂപ വരുമാനം അടിസ്ഥാനമാക്കിയാണ് നഷ്ടപരിഹാരം നിർണയിക്കേണ്ടത്. പണപ്പെരുപ്പവും സാമൂഹ്യ-സാമ്പത്തിക സാഹചര്യങ്ങളും പരിഗണിച്ച് ഈ തുക കാലാനുസൃതമായി പരിഷ്‌കരിക്കാനും സാധ്യതയുണ്ട്.

മുമ്പ് അപകടത്തിൽപ്പെട്ട വ്യക്തിയുടെ വരുമാനത്തെ അടിസ്ഥാനമാക്കിയാണ് നഷ്ടപരിഹാരം കണക്കാക്കിയിരുന്നത്. എന്നാൽ പുതിയ സമീപനം ഇൻഷുറൻസ് കമ്പനികൾ മാറ്റിവെക്കേണ്ട തുകയും വർധിപ്പിക്കും.

പരിശോധന കൂടുതൽ കർശനമാകും

കോടതികൾ അനുവദിക്കുന്ന ഉയർന്ന നഷ്ടപരിഹാരവും വ്യാജ ക്ലെയിമുകളും ഒരുമിച്ച് സാമ്പത്തിക സമ്മർദം സൃഷ്ടിക്കുന്നതിനാൽ, ഇനി മുതൽ തേർഡ് പാർട്ടി ഇൻഷുറൻസ് ക്ലെയിമുകളിൽ കൂടുതൽ വിശദമായ പരിശോധനകൾ നടത്താനാണ് കമ്പനികളുടെ തീരുമാനം. അപകടത്തിന്റെ സാഹചര്യങ്ങൾ, രേഖകൾ, മെഡിക്കൽ തെളിവുകൾ, മറ്റ് അനുബന്ധ വിവരങ്ങൾ എന്നിവ കൂടുതൽ സൂക്ഷ്മമായി പരിശോധിച്ച ശേഷമാകും ക്ലെയിമുകൾ തീർപ്പാക്കുക.