കണ്ണിന് മുകളിൽ പല്ല് വളർന്നു; 16കാരന്റെ ശസ്ത്രക്രിയയിൽ അപൂർവ കണ്ടെത്തൽ, എന്താണ് എക്ടോപിക് ടൂത്ത്?

ചെന്നൈ: തമിഴ്‌നാട്ടിൽ 16കാരന്റെ ഇടത് കണ്ണിന് മുകളിൽ നിന്ന് പൂർണമായി വളർന്ന പല്ല് ശസ്ത്രക്രിയയിലൂടെ നീക്കം ചെയ്തു. കണ്ണിന്റെ സോക്കറ്റിന്റെ മുകൾഭാഗത്താണ് പല്ല് രൂപപ്പെട്ടത്. ഈ ഭാഗത്ത് പല്ല് വളരുന്നത് അത്യപൂർവമാണെന്ന് മധുരയിലെ അരവിന്ദ് ഐ ഹോസ്പിറ്റലിലെ ഡോക്ടർമാർ വ്യക്തമാക്കി. ഒഫ്താൽമോളജി ജേണലിലാണ് ഈ കേസ് റിപ്പോർട്ട് ചെയ്തത്. എങ്ങനെയാണ് പല്ല് കണ്ടെത്തിയത്? ഒരു മാസത്തോളമായി ഇടത് കൺപോളയുടെ മുകൾഭാഗത്ത് വീക്കമുണ്ടായതിനെ തുടർന്നാണ് കൗമാരക്കാരൻ ആശുപത്രിയിലെത്തിയത്. വേദനയുണ്ടായിരുന്നില്ല. പരിശോധനയിൽ കൺപോളയുടെ ഉൾവശത്തായി വീക്കമുള്ള ചർമത്തിനടിയിൽ കട്ടിയുള്ള രണ്ട് വെളുത്ത ഭാഗങ്ങൾ ഡോക്ടർമാർ കണ്ടെത്തി. സ്പർശിച്ചപ്പോൾ പല്ലുപോലെ കട്ടിയുള്ളതായി അനുഭവപ്പെട്ടു. തുടർന്ന് നടത്തിയ സിടി സ്കാനിലാണ് പല്ലിന്റെ ആകൃതിയിലുള്ള വസ്തു കണ്ടെത്തിയത്. കൺപോളയ്ക്കും കണ്ണിന്റെ സോക്കറ്റിന്റെ ആഴത്തിലുള്ള ഭാഗത്തിനും ഇടയിലുള്ള നേർത്ത പാളിയായ ഓർബിറ്റൽ സെപ്റ്റത്തിന് മുന്നിലേക്കാണ് പല്ല് നീണ്ടുനിന്നത്. ശസ്ത്രക്രിയയിലൂടെ പല്ല് നീക്കം ചെയ്തു. പരിശോധനയിൽ ഇത് പൂർണമായി വളർന്ന എക്ടോപിക് ടൂത്താണെന്നും ട്യൂമർ കോശങ്ങളൊന്നും ഇല്ലെന്നും സ്ഥിരീകരിച്ചു. എന്താണ് എക്ടോപിക് ടൂത്ത്? പല്ല് സാധാരണയായി വളരേണ്ട സ്ഥലത്തിന് പകരം മറ്റൊരു ഭാഗത്ത് രൂപപ്പെടുന്ന അവസ്ഥയെയാണ് എക്ടോപിക് ടൂത്ത് എന്നു പറയുന്നത്. ചിലരിൽ വായ്ക്കുള്ളിൽ തന്നെ അസാധാരണമായ സ്ഥാനങ്ങളിൽ പല്ലുകൾ വളരാം. എന്നാൽ വായയ്ക്ക് പുറത്തുള്ള ഭാഗങ്ങളിൽ പല്ല് രൂപപ്പെടുന്നത് വളരെ അപൂർവമാണ്. കൗമാരക്കാരന്റെ കണ്ണിന് മുകളിൽ പല്ല് വളർന്നത് ഈ വിഭാഗത്തിൽപ്പെടുന്നു. എന്തുകൊണ്ടാണ് ഇങ്ങനെ സംഭവിക്കുന്നത്? ഭ്രൂണവളർച്ചയിലോ ശരീരത്തിന്റെ വികാസഘട്ടത്തിലോ ഉണ്ടാകുന്ന വ്യതിയാനങ്ങൾ, ജനിതക ഘടകങ്ങൾ, അണുബാധകൾ, പരിക്കുകൾ എന്നിവ ചില സന്ദർഭങ്ങളിൽ അസാധാരണ സ്ഥാനങ്ങളിൽ പല്ലുകൾ വളരുന്നതുമായി ബന്ധപ്പെട്ടിരിക്കാം. എന്നാൽ ഈ കുട്ടിയുടെ കാര്യത്തിൽ കൃത്യമായ കാരണം കണ്ടെത്താനായിട്ടില്ല. സ്കാനിൽ ശരീരത്തിന്റെ മറ്റു ഭാഗങ്ങളിൽ ഇത്തരത്തിൽ സ്ഥാനംതെറ്റി വളർന്ന പല്ലുകളൊന്നും കണ്ടെത്തിയില്ല. വീണ്ടും ഇത്തരമൊരു പല്ല് വളരാനുള്ള സാധ്യത കുറവാണെന്നും ഡോക്ടർമാർ വിലയിരുത്തി. കണ്ണിന് മുകളിൽ പല്ല് വളരുന്നത് എത്രത്തോളം അപൂർവം? മൂക്ക്, താടി, മാക്സിലറി സൈനസ് തുടങ്ങിയ ഭാഗങ്ങളിൽ എക്ടോപിക് പല്ലുകൾ വളർന്ന സംഭവങ്ങൾ മുമ്പും റിപ്പോർട്ട് ചെയ്തിട്ടുണ്ട്. കണ്ണിന്റെ സോക്കറ്റിന്റെ താഴ്ഭാഗത്ത് പല്ല് വളർന്ന സംഭവങ്ങളും രേഖപ്പെടുത്തിയിട്ടുണ്ട്.എന്നാൽ കണ്ണിന്റെ സോക്കറ്റിന്റെ മുകൾഭാഗമായ സുപ്പീരിയർ ഓർബിറ്റിൽ പല്ല് വളരുന്ന സംഭവത്തിന്റെ മുൻ റിപ്പോർട്ടുകൾ കണ്ടെത്താനായില്ലെന്നാണ് മധുരയിലെ ഡോക്ടർമാർ വ്യക്തമാക്കിയത്. അതുകൊണ്ടുതന്നെ ഈ കേസ് വൈദ്യശാസ്ത്രരംഗത്ത് ശ്രദ്ധേയമാകുന്നു.