അർജന്റീന-ഇംഗ്ലണ്ട് സെമി ഫൈനൽ: ഇന്ന് കളി നിയന്ത്രിക്കുന്നത് മെസ്സിയുടെ ‘സ്വന്തം റഫറി’
അത്ലാന്റ: ഫിഫ ലോകകപ്പിന്റെ രണ്ടാം സെമിഫൈനലിൽ അർജന്റീന ഇന്ന് ഇംഗ്ലണ്ടിനെ നേരിടാനിരിക്കെ, കളിക്കളത്തിന് പുറത്ത് റഫറി നിയമനത്തെച്ചൊല്ലിയുള്ള ചർച്ചകൾ കൊഴുക്കുകയാണ്. അത്ലാന്റയിൽ നടക്കുന്ന ഈ ആവേശപ്പോരാട്ടം നിയന്ത്രിക്കാൻ മൊറോക്കൻ വംശജനായ അമേരിക്കൻ റഫറി ഇസ്മായിൽ ഇൽഫാത്തിനെയാണ് ഫിഫ ചുമതലപ്പെടുത്തിയിരിക്കുന്നത്. ലയണൽ മെസ്സിയുമായി ബന്ധപ്പെട്ട മത്സരങ്ങളിൽ ഇൽഫാത്തിന്റെ സാന്നിധ്യം അർജന്റീനയ്ക്ക് എന്നും ഭാഗ്യം കൊണ്ടുവന്നിട്ടുണ്ട് എന്ന വിലയിരുത്തലിലാണ് ഫുട്ബോൾ ലോകം ഈ നിയമനത്തെ ‘മെസ്സിയുടെ സ്വന്തം റഫറി’ എന്ന രീതിയിൽ നോക്കിക്കാണുന്നത്. ലയണൽ മെസ്സി കളിച്ചതും ഇൽഫാത്ത് നിയന്ത്രിച്ചതുമായ അഞ്ച് മത്സരങ്ങളിലും മെസ്സിയുടെ ടീം പരാജയമറിഞ്ഞിട്ടില്ല എന്ന അപൂർവ്വ റെക്കോർഡാണ് ഇതിന് പ്രധാന കാരണം. മെസ്സിയുടെ ക്യാപ്റ്റൻസിയിൽ അർജന്റീന കിരീടമുയർത്തിയ 2022 ഖത്തർ ലോകകപ്പ് ഫൈനലിൽ ഫ്രാൻസിനെതിരെയുള്ള മത്സരത്തിൽ ഫോർത്ത് ഒഫീഷ്യൽ ഇൽഫാത്ത് ആയിരുന്നു. കൂടാതെ, മെസ്സിയുടെ നിലവിലെ ക്ലബ്ബായ ഇന്റർ മയാമി അവരുടെ ചരിത്രത്തിലെ ആദ്യ കിരീടം നേടിയ 2023ലെ ലീഗ്സ് കപ്പ് ഫൈനലിൽ കളി നിയന്ത്രിച്ചതും ഇദ്ദേഹമായിരുന്നു. മേജർ ലീഗ് സോക്കറിൽ മെസ്സി കളിച്ച നാല് മത്സരങ്ങളിലും ഇൽഫാത്ത് തന്നെയായിരുന്നു റഫറി; ഈ മത്സരങ്ങളിലെല്ലാം മെസ്സിയുടെ ടീം വിജയിക്കുകയും ചെയ്തു.ഈ അപൂർവ്വ ഭാഗ്യജാതകം സോഷ്യൽ മീഡിയയിൽ ഇതിനകം വലിയ ചർച്ചയായിട്ടുണ്ട്. പ്രത്യേകിച്ച് ഇംഗ്ലണ്ട് ആരാധകർ ഈ റഫറി നിയമനത്തിൽ ആശങ്ക പ്രകടിപ്പിക്കുന്നുണ്ടെങ്കിലും, കളിക്കളത്തിലെ മുൻവിധികളില്ലാത്ത മികച്ച പ്രകടനമാണ് 44കാരനായ ഇൽഫാത്തിനെ ഈ നിർണായക മത്സരത്തിലേക്ക് എത്തിച്ചത്. നിലവിലെ ലോകകപ്പിൽ നെതർലാൻഡ്സ്-ജപ്പാൻ, സ്പെയിൻ-ഉറുഗ്വേ ഗ്രൂപ്പ് മത്സരങ്ങളും, പ്രീ-ക്വാർട്ടറിൽ ബ്രസീലിനെ നോർവേ അട്ടിമറിച്ച മത്സരവും നിയന്ത്രിച്ചത് ഇദ്ദേഹമാണ്. കടുത്ത ‘വാർ’ വിവാദങ്ങളും റഫറിമാർക്കെതിരെയുള്ള വിമർശനങ്ങളും നിലനിൽക്കുന്ന ഈ ടൂർണമെന്റിൽ, പരിചയസമ്പന്നനായ ഇൽഫാത്തിന്റെ സാന്നിധ്യം ഫിഫയ്ക്ക് വലിയ ആത്മവിശ്വാസം നൽകുന്നു.പ്രതിരോധക്കോട്ട തീർക്കുന്ന ഇംഗ്ലണ്ടിനെതിരെ അർജന്റീന കടുത്ത പോരാട്ടത്തിന് ഇറങ്ങുമ്പോൾ കളിക്കളത്തിലെ ഓരോ തീരുമാനവും നിർണായകമാകും. മെസ്സിയുടെ ഭാഗ്യ റഫറിയുടെ സാന്നിധ്യം അർജന്റീനയ്ക്ക് അനുകൂല ഘടകമാകുമോ അതോ ഇംഗ്ലണ്ട് ഈ ചരിത്രം തിരുത്തിക്കുറിക്കുമോ എന്നാണ് ഫുട്ബോൾ ലോകം ഉറ്റുനോക്കുന്നത്.
