കെ-ടെറ്റ് യോഗ്യത: അധ്യാപക നിയമനങ്ങളിൽ കർശന നടപടിയുമായി പൊതുവിദ്യാഭ്യാസ വകുപ്പ്; ഇളവുകൾ റദ്ദാക്കി

​കെ-ടെറ്റ് (K-TET) യോഗ്യത ഇല്ലാത്ത അധ്യാപകർക്ക് ഇനി മുതൽ നിയമന അംഗീകാരവും സ്ഥാനക്കയറ്റവും നൽകേണ്ടതില്ലെന്ന് പൊതുവിദ്യാഭ്യാസ വകുപ്പ് തീരുമാനിച്ചു. നിലവിൽ സർവീസിൽ ഉള്ളവർ ഉൾപ്പെടെയുള്ള എല്ലാ അധ്യാപകരും കെ-ടെറ്റ് പരീക്ഷ പാസാകണമെന്ന മുൻ ഉത്തരവിനെതിരെയുള്ള പുനഃപരിശോധനാ ഹർജികൾ സുപ്രീം കോടതി തള്ളിയതിന്റെ പശ്ചാത്തലത്തിലാണ് ഈ നിർണ്ണായക നടപടി. ഇതിനെത്തുടർന്ന് സർക്കാർ ഇതുവരെ നൽകിയിരുന്ന ഇളവുകളും പൂർണ്ണമായി റദ്ദാക്കിയിട്ടുണ്ട്.

​നിയമനങ്ങളും അഡ്വൈസും സംബന്ധിച്ച പുതിയ വ്യവസ്ഥകൾ

​കെ-ടെറ്റ് യോഗ്യത ഇല്ലാത്തതും എന്നാൽ പി.എസ്.സി. (PSC) അഡ്വൈസ് ലഭിച്ചതുമായ ഉദ്യോഗാർത്ഥികൾക്ക് താൽക്കാലിക നിയമനം നൽകാവുന്നതാണ്.
​എന്നാൽ, അവർ അതാത് കാറ്റഗറിയിലെ കെ-ടെറ്റ് പരീക്ഷ വിജയിക്കുന്ന മുറയ്ക്ക് പി.എസ്.സി. അഡ്വൈസ് സീനിയോറിറ്റി നിലനിർത്തിക്കൊണ്ട് നിയമനം ക്രമീകരിക്കാമെന്ന് ഉത്തരവിൽ വ്യക്തമാക്കുന്നു.
​ശമ്പളവും ആനുകൂല്യങ്ങളും സംബന്ധിച്ച ഇളവുകൾ

​2025 സെപ്റ്റംബർ ഒന്നിന് മുൻപ് ദിവസവേതനാടിസ്ഥാനത്തിൽ ജോലി ചെയ്യുകയും, കെ-ടെറ്റ് ഇല്ലാത്തതിനാൽ ശമ്പളം ലഭിക്കാതിരിക്കുകയും ചെയ്തിട്ടുള്ള അധ്യാപകർക്ക് ആ കാലയളവിലെ ശമ്പളം അനുവദിക്കും. ഇതിനായി ഓരോ കേസും പ്രത്യേകം പരിശോധിച്ച് ദിവസവേതന നിയമനം അംഗീകരിക്കും.
​2025 സെപ്റ്റംബർ ഒന്നിന് മുൻപ് നിയമനാംഗീകാരം ലഭിച്ച അധ്യാപകരുടെ അർഹതപ്പെട്ട ഗ്രേഡ്, ഇൻക്രിമെന്റ് എന്നിവയും അനുവദിക്കുന്നതാണ്.

​2025 സെപ്റ്റംബർ ഒന്നിന് മുൻപ്
എച്ച്.എം. തസ്തികയിൽ സ്ഥാനക്കയറ്റം ലഭിക്കുകയും, എന്നാൽ കെ-ടെറ്റ് യോഗ്യത ഇല്ലാത്തതിനാൽ നിയമനാംഗീകാരം ലഭിക്കാതിരിക്കുകയും ചെയ്തവർ പിന്നീട് യോഗ്യത നേടുകയാണെങ്കിൽ, അവർക്ക് യോഗ്യത നേടിയ തീയതി മുതൽ അംഗീകാരം ലഭിക്കും.ഇത്തരത്തിലുള്ള അധ്യാപകർ ഇതിനോടകം സർവീസിൽ നിന്ന് വിരമിച്ചിട്ടുണ്ടെങ്കിലും, പിന്നീട് കെ-ടെറ്റ് യോഗ്യത നേടിയിട്ടുണ്ടെങ്കിൽ അവർക്കും ഈ ആനുകൂല്യങ്ങൾ ബാധകമാകും.