വാടകയ്ക്കെടുക്കുന്ന വാഹനങ്ങൾ നിയമപരമാണെന്ന് ഉറപ്പാക്കുക: വ്യാജ ‘റെന്റ് എ കാർ’ കെണിയിൽ വീഴരുത്! മുന്നറിയിപ്പുമായി മോട്ടോർ വാഹന വകുപ്പ്
തിരുവനന്തപുരം:- വാടകയ്ക്കെടുക്കുന്ന വാഹനങ്ങൾ നിയമപരമാണെന്ന് ഉറപ്പാക്കുക: വ്യാജ ‘റെന്റ് എ കാർ’ കെണിയിൽ വീഴരുത്!
വ്യക്തിഗത ആവശ്യങ്ങൾക്കോ യാത്രകൾക്കോ വേണ്ടി സ്വകാര്യ വാഹനങ്ങൾ (White Board) അനധികൃതമായി വാടകയ്ക്ക് നൽകുന്നതും എടുക്കുന്നതും മോട്ടോർ വാഹന നിയമപ്രകാരം ഗുരുതരമായ കുറ്റകൃത്യമാണ്. ‘റെന്റ് എ ക്യാബ്’ (Rent a Cab) ലൈസൻസുള്ള കറുത്ത ബോർഡിൽ മഞ്ഞ അക്ഷരങ്ങളുള്ള (Black Board with Yellow Letters) ഔദ്യോഗിക വാഹനങ്ങൾ മാത്രമേ വാടകയ്ക്ക് ഉപയോഗിക്കാൻ അനുവാദമുള്ളൂ.
നിയമവിരുദ്ധമായി വാഹനം വാടകയ്ക്കെടുക്കുന്നവർ നേരിടേണ്ടി വരുന്ന പ്രധാന അപകടങ്ങൾ താഴെ പറയുന്നവയാണ്:
അനധികൃതവും അനഭിലഷണീയവുമായ പ്രവർത്തനങ്ങൾ: സ്വകാര്യ വാഹനങ്ങൾ വാടകയ്ക്ക് നൽകുന്നത് പലപ്പോഴും ലഹരിക്കടത്ത്, ക്രിമിനൽ പ്രവർത്തനങ്ങൾ തുടങ്ങിയ നിയമവിരുദ്ധ കാര്യങ്ങൾക്ക് ദുരുപയോഗം ചെയ്യപ്പെടാൻ സാധ്യത കൂടുതലാണ്.
ഇൻഷുറൻസ് പരിരക്ഷ ലഭിക്കില്ല: സ്വകാര്യ വാഹനങ്ങൾ വാടകയ്ക്ക് ഓടിച്ച് അപകടത്തിൽപ്പെട്ടാൽ ഇൻഷുറൻസ് കമ്പനികൾ പൂർണ്ണമായും ക്ലെയിം നിരസിക്കും. ഉണ്ടാകുന്ന എല്ലാ സാമ്പത്തിക ബാധ്യതകളും വാഹനം ഓടിച്ചയാൾ തന്നെ വഹിക്കേണ്ടി വരും.
നിയമപരമായ സംരക്ഷണം ഉണ്ടാകില്ല: അപകടമോ മറ്റ് നിയമപ്രശ്നങ്ങളോ ഉണ്ടായാൽ വാഹനം ഓടിച്ചയാൾക്കോ ഉടമയ്ക്കോ യാതൊരുവിധ നിയമപരമായ പരിരക്ഷയും ലഭിക്കില്ല.
ഏതുനിമിഷവും പിടിയിലാകാം: മോട്ടോർ വാഹന വകുപ്പിന്റെയും പോലീസിന്റെയും പരിശോധനകളിൽ ഇത്തരം അനധികൃത വാഹനങ്ങൾ ഏതുസമയത്തും പിടിച്ചെടുക്കപ്പെടാം.
ഡ്രൈവർ കേസിൽ പ്രതിയാകും: അനധികൃത വാഹനം ഓടിക്കുന്ന ഡ്രൈവർക്കെതിരെ മോട്ടോർ വാഹന നിയമപ്രകാരം കേസെടുക്കുകയും ഗുരുതരമായ നിയമനടപടികൾ സ്വീകരിക്കുകയും ചെയ്യും.
കനത്ത പിഴയും തടവും: ഇത്തരം നിയമലംഘനങ്ങൾക്ക് വലിയ തുക പിഴയായും വാഹനം കണ്ടുകെട്ടുന്നതടക്കമുള്ള കർശന നടപടികൾക്കും വിധേയമാകേണ്ടി വരും.
