എത്ര ശ്രമിച്ചിട്ടും കുടവയർ കുറയുന്നില്ലേ? വ്യായാമം മാത്രം പോര; ഒഴിവാക്കാം ഈ അഞ്ച് തെറ്റായ ഭക്ഷണശീലങ്ങൾ

ജിമ്മിൽ പോയി മണിക്കൂറുകളോളം വിയർപ്പൊഴുക്കിയിട്ടും, പലതരം ഡയറ്റുകൾ പരീക്ഷിച്ചിട്ടും വയറ്റിലെ കൊഴുപ്പ് മാത്രം കുറയുന്നില്ല എന്നത് പലരുടെയും സ്ഥിരം പരാതിയാണ്. ഇതിന്റെ യഥാർഥ കാരണം പലപ്പോഴും വ്യായാമത്തിന്റെ കുറവല്ല, മറിച്ച് നമ്മുടെ ഉപാപചയ പ്രവർത്തനങ്ങളെ താളംതെറ്റിക്കുന്ന ‘ഇൻസുലിൻ റെസിസ്റ്റൻസ്’ ആണ്. ശരീരത്തിലെ കോശങ്ങൾ ഇൻസുലിനോട് പ്രതികരിക്കാതിരിക്കുകയും, തൽഫലമായി രക്തത്തിൽ പഞ്ചസാരയുടെ അളവ് വർധിക്കുകയും ചെയ്യുന്ന അവസ്ഥയാണിത്. ഇങ്ങനെ അധികമായി വരുന്ന പഞ്ചസാരയെ ശരീരം കൊഴുപ്പായി, പ്രത്യേകിച്ച് വയറിന് ചുറ്റും ശേഖരിച്ചുവെക്കുന്നു. നമ്മുടെ ചില തെറ്റായ ഭക്ഷണശീലങ്ങളാണ് ഇൻസുലിൻ റെസിസ്റ്റൻസിലേക്ക് നയിക്കുന്നത്. കുടവയർ കുറയ്ക്കാൻ നിങ്ങൾ ആദ്യം തിരുത്തേണ്ട അഞ്ച് പ്രധാന ഭക്ഷണശീലങ്ങൾ ഇവയാണ്: ഇടവിട്ട് എപ്പോഴും ഭക്ഷണം കഴിക്കുന്ന ശീലം വിശപ്പില്ലെങ്കിലും എപ്പോഴും എന്തെങ്കിലും കൊറിച്ചുകൊണ്ടിരിക്കുന്ന ശീലം പലർക്കുമുണ്ട്. നിങ്ങൾ ഭക്ഷണം കഴിക്കുമ്പോഴെല്ലാം ശരീരത്തിൽ ഇൻസുലിൻ ഉത്പാദിപ്പിക്കപ്പെടുന്നുണ്ട്. ഇടവിട്ട് എപ്പോഴും സ്നാക്സുകൾ കഴിക്കുമ്പോൾ ഇൻസുലിൻ ലെവൽ എപ്പോഴും ഉയർന്ന നിലയിലായിരിക്കും. ഇത് ഇൻസുലിൻ റെസിസ്റ്റൻസിലേക്കും അതുവഴി കൊഴുപ്പ് അടിഞ്ഞുകൂടാനും കാരണമാകുന്നു. ഭക്ഷണങ്ങൾക്കിടയിൽ കൃത്യമായ ഇടവേളകൾ നൽകേണ്ടത് അത്യാവശ്യമാണ്. സംസ്കരിച്ച അന്നജവും മധുരവും മൈദ കൊണ്ടുള്ള വിഭവങ്ങൾ, വെളുത്ത ചോറ്, ബ്രെഡ്, ബേക്കറി പലഹാരങ്ങൾ, മധുരപാനീയങ്ങൾ തുടങ്ങിയവയിൽ സംസ്കരിച്ച അന്നജം ധാരാളമായി അടങ്ങിയിട്ടുണ്ട്. ഇവ കഴിക്കുമ്പോൾ രക്തത്തിലെ ഗ്ലൂക്കോസിന്റെ അളവ് വളരെ വേഗത്തിൽ കുതിച്ചുയരുകയും, ഇതിനെ നിയന്ത്രിക്കാൻ പാൻക്രിയാസിന് അമിതമായ അളവിൽ ഇൻസുലിൻ ഉത്പാദിപ്പിക്കേണ്ടി വരികയും ചെയ്യുന്നു. കാലക്രമേണ ഇത് ഇൻസുലിൻ പ്രതിരോധത്തിലേക്ക് നയിക്കും. ഡയറ്റിൽ ഫൈബറിന്റെ കുറവ് നമ്മുടെ ഭക്ഷണത്തിൽ പച്ചക്കറികൾ, ഇലക്കറികൾ, മുഴുവൻ ധാന്യങ്ങൾ എന്നിവ ഉൾപ്പെടുത്താത്തത് വലിയൊരു തെറ്റാണ്. ഫൈബർ അടങ്ങിയ ഭക്ഷണങ്ങൾ രക്തത്തിലേക്ക് പഞ്ചസാര ആഗിരണം ചെയ്യുന്ന പ്രക്രിയയെ സാവധാനത്തിലാക്കുന്നു. ഫൈബർ ഇല്ലാത്ത ഭക്ഷണങ്ങൾ പെട്ടെന്ന് ദഹിക്കുകയും ബ്ലഡ് ഷുഗർ ലെവൽ പെട്ടെന്ന് കൂട്ടുകയും ചെയ്യും. അതിനാൽ വയറ്റിലെ കൊഴുപ്പ് കുറയ്ക്കാൻ ആഗ്രഹിക്കുന്നവർ ഫൈബർ അടങ്ങിയ ഭക്ഷണങ്ങൾ കൂടുതലായി കഴിക്കണം. പ്രോട്ടീൻ ആവശ്യത്തിന് കഴിക്കാതിരിക്കുന്നത് ഒരു ദിവസത്തെ ഭക്ഷണത്തിൽ ആവശ്യത്തിന് പ്രോട്ടീൻ ഉൾപ്പെടുത്താതിരിക്കുന്നത് മറ്റൊരു പ്രധാന അബദ്ധമാണ്. കാർബോഹൈഡ്രേറ്റുകളെ അപേക്ഷിച്ച് പ്രോട്ടീൻ ദഹിക്കാൻ കൂടുതൽ സമയമെടുക്കും. ഇത് പെട്ടെന്ന് വിശക്കുന്നത് തടയുകയും, വയറു നിറഞ്ഞെന്ന തോന്നൽ ഉണ്ടാക്കുകയും ചെയ്യുന്നു. കൂടാതെ ഇൻസുലിൻ നില പെട്ടെന്ന് ഉയരുന്നത് തടയാനും പ്രോട്ടീൻ സഹായിക്കും. മുട്ട, മത്സ്യം, പയർവർ​ഗങ്ങൾ എന്നിവ ഭക്ഷണത്തിൽ ഉൾപ്പെടുത്തുക. രാത്രി വൈകിയുള്ള അമിതഭക്ഷണം രാത്രി വൈകി അമിതമായി ഭക്ഷണം കഴിക്കുന്നത് ശരീരത്തിന്റെ സ്വാഭാവിക സർക്കാഡിയൻ റിഥത്തെ ദോഷകരമായി ബാധിക്കും. രാത്രി സമയങ്ങളിൽ ശരീരത്തിന്റെ ഇൻസുലിൻ സെൻസിറ്റിവിറ്റി കുറവായിരിക്കും. അതിനാൽ വൈകി കഴിക്കുന്ന ഭക്ഷണത്തിലെ കലോറികൾ ഊർജമായി മാറുന്നതിന് പകരം കൊഴുപ്പായി ശരീരത്തിൽ, പ്രത്യേകിച്ച് വയറിന് ചുറ്റും അടിഞ്ഞുകൂടാനുള്ള സാധ്യത വളരെ കൂടുതലാണ്. വ്യായാമത്തിനൊപ്പം തന്നെ മുകളിൽ പറഞ്ഞ തെറ്റായ ഭക്ഷണശീലങ്ങൾ ഒഴിവാക്കുകയും ചെയ്താൽ മാത്രമേ ഇൻസുലിൻ റെസിസ്റ്റൻസ് ഇല്ലാതാക്കാനും, ശാശ്വതമായി കുടവയർ കുറയ്ക്കാനും സാധിക്കുകയുള്ളൂ.