ഭക്ഷണം കഴിച്ചുകഴിഞ്ഞാൽ മധുരം വേണമെന്നുണ്ടോ? കാരണം വെറും ശീലം മാത്രമല്ല

ഭക്ഷണം കഴിച്ച് വയറുനിറഞ്ഞാലും പിന്നാലെ ഒരു മധുരം കഴിക്കണമെന്ന് തോന്നാറുണ്ടോ? ഒരു കഷ്ണം ചോക്ലേറ്റ്, ബിസ്കറ്റ്, ഐസ്ക്രീം, മധുരപലഹാരം തുടങ്ങി എന്തെങ്കിലും കഴിച്ചാലേ ഭക്ഷണം പൂർണമാകൂ എന്ന തോന്നൽ പലർക്കുമുണ്ട്. വിശപ്പില്ലെങ്കിലും ഈ ആഗ്രഹം ഉണ്ടാകുന്നതാണ് ശ്രദ്ധേയം. ഇതിന് പിന്നിൽ വെറും ‘മധുരത്തോടുള്ള ഇഷ്ടം’ മാത്രമല്ല, ഭക്ഷണവുമായി ബന്ധപ്പെട്ട ശീലങ്ങളും തലച്ചോറിന്റെ റിവാർഡ് സംവിധാനവും പ്രധാന പങ്കുവഹിക്കുന്നുണ്ട്. ശീലം എങ്ങനെ മധുരത്തോടുള്ള ആഗ്രഹമായി മാറുന്നു? എല്ലാ ദിവസവും ഭക്ഷണത്തിന് ശേഷം മധുരം കഴിക്കുന്ന പതിവുണ്ടെങ്കിൽ, പിന്നീട് ഭക്ഷണം കഴിക്കുന്നതുതന്നെ മധുരത്തിനുള്ള ഒരു സൂചനയായി തലച്ചോറിൽ മാറാം. ഭക്ഷണം കഴിഞ്ഞാൽ മധുരം ലഭിക്കുമെന്ന് തലച്ചോർ പഠിക്കുന്നതാണ് ഇതിന് പിന്നിൽ. അതുകൊണ്ടുതന്നെ വയറുനിറഞ്ഞിരിക്കുമ്പോഴും ‘ഇനി എന്തെങ്കിലും മധുരം വേണം’ എന്ന തോന്നൽ ഉണ്ടാകാം. ഭക്ഷണത്തിന്റെ രുചിയും ഇതിൽ സ്വാധീനം ചെലുത്തും. ഉപ്പുരുചിയുള്ള ഭക്ഷണത്തിന് ശേഷം വ്യത്യസ്തമായ മധുരരുചി കൂടുതൽ ആകർഷകമായി തോന്നാനും സാധ്യതയുണ്ട്. കൂടാതെ സമ്മർദം, ഉറക്കക്കുറവ്, മാനസിക ക്ഷീണം തുടങ്ങിയവയും മധുരമുള്ള ഭക്ഷണങ്ങളിലേക്കുള്ള താൽപര്യം വർധിപ്പിക്കാം. ഭക്ഷണത്തിന്റെ ക്രമം മാറ്റിയാൽ ഗുണമുണ്ടാകുമോ? ഭക്ഷണം കഴിക്കുന്ന ക്രമം രക്തത്തിലെ ഗ്ലൂക്കോസ് ഉയരുന്ന രീതിയെ സ്വാധീനിക്കാമെന്നാണ് ചില പഠനങ്ങൾ സൂചിപ്പിക്കുന്നത്. പ്രത്യേകിച്ച് പച്ചക്കറികളും മറ്റ് ഫൈബർ അടങ്ങിയ ഭക്ഷണങ്ങളും ആദ്യം കഴിച്ച് പിന്നീട് കാർബോഹൈഡ്രേറ്റ് അടങ്ങിയ ചോറ്, ചപ്പാത്തി തുടങ്ങിയവ കഴിക്കുന്നത് ചിലരിൽ ഭക്ഷണശേഷമുള്ള രക്തത്തിലെ പഞ്ചസാര ഉയർച്ച കുറയ്ക്കാൻ സഹായിച്ചേക്കാം. എന്നാൽ ഭക്ഷണത്തിന്റെ ക്രമം മാറ്റുന്നത് മധുരത്തോടുള്ള ആഗ്രഹം പൂർണമായി ഇല്ലാതാക്കുമെന്നതിന് ഉറച്ച തെളിവില്ല. അതിനാൽ ഇത് ഒരു ലളിതമായ ഭക്ഷണശീലം എന്ന നിലയിൽ കാണുന്നതാണ് ഉചിതം. മധുരം കഴിക്കണമെന്ന് തോന്നുമ്പോൾ എന്തുചെയ്യാം? മധുരം പൂർണമായി ഒഴിവാക്കാൻ ശ്രമിക്കുന്നതിനേക്കാൾ അളവ് നിയന്ത്രിക്കുന്നതാണ് പലർക്കും പ്രായോഗികം. പഴങ്ങൾ, നട്സ് പോലുള്ള പോഷകസമൃദ്ധമായ ഭക്ഷണങ്ങൾ തിരഞ്ഞെടുക്കുന്നതും സഹായകരമാണ്. ദിവസവും ഭക്ഷണത്തിന് ശേഷം മധുരം കഴിക്കുന്ന ശീലമുണ്ടെങ്കിൽ, അളവ് പതുക്കെ കുറയ്ക്കുകയോ ചില ദിവസങ്ങളിൽ ഒഴിവാക്കുകയോ ചെയ്യാം. അതോടൊപ്പം മതിയായ ഉറക്കം, സമ്മർദം നിയന്ത്രിക്കൽ, ക്രമമായ ഭക്ഷണശീലം എന്നിവയും പ്രധാനമാണ്. ഭക്ഷണം കഴിച്ചിട്ടും മധുരത്തോടുള്ള ആഗ്രഹം നിയന്ത്രിക്കാനാകാത്തവിധം സ്ഥിരമായി തുടരുകയോ അമിതമായി ഭക്ഷണം കഴിക്കുന്ന ശീലത്തോടൊപ്പം ഉണ്ടാകുകയോ ചെയ്യുന്നുവെങ്കിൽ, ഡോക്ടറുടെയോ ഡയറ്റീഷ്യന്റെയോ സഹായം തേടുന്നത് നല്ലതാണ്.