ലോകത്തിലെ ഏറ്റവും പഴക്കമുള്ള പഴം ഏതാണെന്ന് അറിയുമോ?

ലോകത്തിലെ ഏറ്റവും പഴക്കമുള്ള പഴം ഏതെന്ന ചോദ്യത്തിന് മിക്കവരുടെയും ഉത്തരം ആപ്പിൾ എന്നായിരിക്കും. പുരാണങ്ങളിലും ചരിത്ര കഥകളിലും ആപ്പിളിന് വലിയ സ്ഥാനമുണ്ട്. എന്നാൽ ലോകത്ത് ആദ്യമായി മനുഷ്യൻ കൃഷി ചെയ്തു തുടങ്ങിയ പഴം ആപ്പിളല്ല എന്നതാണ് സത്യം. മനുഷ്യരാശി ഏറ്റവും ആദ്യം നട്ടുവളർത്തിയ ആ പഴം മറ്റൊന്നുമല്ല, അത്തിപ്പഴം (Fig) ആണ്! കൃഷിയുടെ തുടക്കത്തിനും മുൻപേയുള്ള ചരിത്രംചരിത്രകാരന്മാരെയും ശാസ്ത്രജ്ഞരെയും അമ്പരപ്പിക്കുന്നതാണ് അത്തിപ്പഴത്തിന്റെ ചരിത്രം. ജോർദാൻ താഴ്‌വരയിലെ ഗിൽഗാൽ എന്ന പുരാതന ഗ്രാമത്തിൽ നടത്തിയ ഉത്ഖനനങ്ങളിൽ ബിസി 9,400നും 9,200നും ഇടയിൽ മനുഷ്യർ അത്തിപ്പഴം കൃഷി ചെയ്തിരുന്നതിന്റെ തെളിവുകൾ ലഭിച്ചിട്ടുണ്ട്. അതായത്, ഗോതമ്പും ബാർലിയും പോലുള്ള പ്രധാന വിളകൾ കൃഷി ചെയ്യാൻ തുടങ്ങുന്നതിനും വളരെ മുൻപ് തന്നെ മനുഷ്യർ അത്തിപ്പഴം നട്ടുവളർത്തിയിരുന്നു. ആപ്പിൾ കൃഷി ആരംഭിക്കുന്നതിനും ഏകദേശം 11,000 വർഷങ്ങൾക്ക് മുൻപാണിത്. ഹാർവാർഡ് സർവകലാശാലയിലെ ഗവേഷകരാണ് 11,200ലധികം വർഷം പഴക്കമുള്ള അത്തിപ്പഴത്തിന്റെ ഫോസിലുകൾ കണ്ടെത്തിയത്.എന്തുകൊണ്ടാണ് അത്തിപ്പഴം തിരഞ്ഞെടുക്കപ്പെട്ടത്?പുരാതന കാലത്ത് മനുഷ്യർ അത്തിപ്പഴത്തിന് ഇത്രയധികം പ്രാധാന്യം നൽകാൻ വ്യക്തമായ കാരണങ്ങളുണ്ട്. വളരെ എളുപ്പത്തിൽ കൃഷി ചെയ്യാമെന്നതും ഇതിന്റെ സ്വാഭാവിക മധുരവും അന്നത്തെ ആളുകളെ ആകർഷിച്ചു. പോഷകങ്ങളുടെ കലവറയായ അത്തിപ്പഴം ഉണക്കി സൂക്ഷിക്കാനും ദീർഘദൂര യാത്രകളിൽ കൊണ്ടുപോകാനും വളരെ എളുപ്പമായിരുന്നു. ഭക്ഷ്യസംരക്ഷണ മാർഗങ്ങൾ അധികമില്ലാതിരുന്ന ആ കാലഘട്ടത്തിൽ, കേടുകൂടാതെ ദീർഘകാലം സൂക്ഷിക്കാൻ കഴിയുന്ന ഒന്നായിരുന്നു അത്തിപ്പഴം. നാരുകൾ, കാൽസ്യം, പൊട്ടാസ്യം എന്നിവയാൽ സമ്പന്നമായതിനാൽ പുരാതന ഈജിപ്ഷ്യൻ, ഗ്രീക്ക് സംസ്കാരങ്ങളിലും ഇവയ്ക്ക് വലിയ സ്ഥാനമുണ്ടായിരുന്നു. മതപരമായ ചടങ്ങുകളിലും അന്നത്തെ കാലത്ത് മധുരം നൽകാനും ഇവ വ്യാപകമായി ഉപയോഗിച്ചിരുന്നു.അപ്പോൾ ആപ്പിളിന്റെ കാര്യമോ?ആപ്പിളിനും അതിന്റേതായ വലിയ ചരിത്രമുണ്ടെങ്കിലും, അത്തിപ്പഴത്തിന് വളരെ കാലങ്ങൾക്ക് ശേഷമാണ് ആപ്പിൾ മനുഷ്യൻ മെരുക്കിയെടുത്തത്. മധ്യേഷ്യയിലെ കാട്ടുചെടികളിൽ നിന്നാണ് ഇന്നത്തെ ആപ്പിളിന്റെ ഉത്ഭവം എന്നാണ് കരുതപ്പെടുന്നത്. പിന്നീട് വ്യാപാര പാതകളിലൂടെ ലോകമെമ്പാടും പടർന്നു പന്തലിക്കുകയായിരുന്നു. എന്നാൽ ലോകത്തിലെ ആദ്യത്തെ കൃഷി ചെയ്ത പഴം എന്ന പദവി അത്തിപ്പഴത്തിന് മാത്രം സ്വന്തമാണ്. അതുകൊണ്ട് തന്നെ അടുത്ത തവണ ഏറ്റവും പഴയ പഴം ഏതാണെന്ന് ആരെങ്കിലും ചോദിച്ചാൽ, അത് ആപ്പിളല്ല മറിച്ച് അത്തിപ്പഴമാണെന്ന് ഇനി നിങ്ങൾക്ക് ഉറപ്പിച്ചു പറയാം!