ഒരു ഗ്ലാസ് ചായയോട് കൂടി മാത്രമാണോ നിങ്ങളുടെ ദിവസം തുടങ്ങുന്നത്; കാത്തിരിക്കുന്നത് വലിയ അപകടം, ഇക്കാര്യങ്ങൾ ശ്രദ്ദിക്കണം

മിക്ക ഇന്ത്യൻ വീടുകളിലെയും രാവിലെയുള്ള ദിനചര്യകൾക്ക് ഏതാണ്ട് ഒരേ അന്തരീക്ഷമാണ്. പ്രഷർ കുക്കറിന്റെ വിസിൽ ശബ്ദം തുടങ്ങി, റിമോട്ടിനായി വഴക്കിടലും, അടുക്കളയിലെ ബഹളവും, സ്കൂളിലേക്ക് പോകാനുള്ള കുട്ടികളുടെ തിരക്കും തുടങ്ങി പലതും നീളുന്നു. ആ മനോഹരമായ ബഹളങ്ങൾക്കിടയിൽ എവിടെയോ വെച്ച് ഒരു കപ്പ് ചായ നിശബ്ദമായി നമ്മുടെ പ്രഭാതഭക്ഷണമായി മാറുന്നു. എന്നാൽ, ഇവിടെ യഥാർത്ഥ പ്രശ്നം ആരംഭിക്കുകയാണെന്നാണ് ഡയറ്റീഷ്യനും വെൽനസ് കോച്ചുമായ സിമ്രത് കതുരിയ പറയുന്നത്. ഒരു ദിവസത്തെ ആദ്യത്തെ ഭക്ഷണം നമ്മുടെ ഊർജ്ജം, ഉപാപചയപ്രവർത്തനം (metabolism), മൊത്തത്തിലുള്ള ആരോഗ്യം എന്നിവയുടെ ഗതി നിർണയിക്കുന്ന ഒന്നാണെന്ന് അവർ വിശദീകരിക്കുന്നു. മിക്ക ഇന്ത്യക്കാരും വരുത്തുന്ന ഏറ്റവും വലിയ പോഷകാഹാര പിഴവുകളിലൊന്ന്, പോഷകഗുണമുള്ള ഒരു പ്രഭാതഭക്ഷണം കഴിക്കുന്നതിന് പകരം ചായയോ, കാപ്പിയോ അല്ലെങ്കിൽ മധുരമുള്ള പലഹാരങ്ങളോ മാത്രം കഴിച്ച് തൃപ്തിപ്പെടുക എന്നതാണ്. നഗരപ്രദേശങ്ങളിലുള്ള മിക്ക ഇന്ത്യക്കാരോടും രാവിലെ എഴുന്നേറ്റയുടൻ എന്താണ് കഴിക്കാറുള്ളതെന്ന് ചോദിച്ചാൽ, അതിനുള്ള മറുപടി ചായയുടെ ഏതെങ്കിലും ഒരു രൂപമായിരിക്കും പറയുക. നല്ലൊരു ആഹാരം കഴിക്കുന്നതിന് മുമ്പ്, ചിലപ്പോൾ ഇതേ ക്രമത്തിൽ ചായയും കാപ്പിയും കുടിക്കുന്നവരുണ്ടാകാം. ഇത് ശരീരത്തിന് ഊർജ്ജം നൽകുന്ന ഇന്ധനമായി പലർക്കും തോന്നാം. “പ്രഭാതഭക്ഷണത്തിന് മുമ്പ് ഒരു കപ്പ് ചായയോ കാപ്പിയോ കുടിക്കുന്നത് ഒരു ആചാരം പോലെ പലരും കൊണ്ടുനടക്കുന്ന ശീലമാണ്. ചിലരിൽ ഇത് അസിഡിറ്റി വർധിപ്പിക്കാനും ദഹനസംബന്ധമായ അസ്വസ്ഥതകൾ ഉണ്ടാക്കാനും കാരണമാകും. പിന്നീട് ശരീരത്തിന്റെ ഊർജ്ജനിലയിൽ പെട്ടെന്നുള്ള ഏറ്റക്കുറച്ചിലുകൾക്ക് വഴിമാറുകയും ചെയ്യും.” അവർ പറയുന്നു പ്രഭാതഭക്ഷണം കഴിക്കുന്നവർ പോലും പലപ്പോഴും തെറ്റായ രീതിയിലുള്ള ഭക്ഷണമാണ് തിരഞ്ഞെടുക്കുന്നത്. ഇത് അടുത്ത ഏതാനും മണിക്കൂറുകളിലേക്ക് ശരീരത്തിന് ആവശ്യമായ ഊർജ്ജം നൽകാതെ അതിനെ തളർത്തുന്നു. നമ്മുടെ നാട്ടിലെ സാധാരണ പ്രഭാതഭക്ഷണങ്ങളിൽ ഭൂരിഭാഗവും ശുദ്ധീകരിച്ച കാർബോഹൈഡ്രേറ്റുകൾ അടങ്ങിയതാണ്. വെണ്ണ പുരട്ടിയ വെള്ള ബ്രെഡ്, കാര്യമായി ഒന്നും ചേർക്കാത്ത വെറും പോഹ , ചെറിയ അളവിൽ സാമ്പാർ ചേർത്ത ഇഡ്ഡലി, അല്ലെങ്കിൽ പാൽ ചേർത്ത കോൺഫ്ലേക്സ് എന്നിവയെല്ലാം ഇതിന് ഉദാഹരണങ്ങളാണ്. പ്രധാനമായും ശുദ്ധീകരിച്ച കാർബോഹൈഡ്രേറ്റുകൾ മാത്രമടങ്ങിയ പ്രഭാതഭക്ഷണം കഴിച്ചാൽ വളരെ പെട്ടെന്ന് തന്നെ വീണ്ടും വിശപ്പ് തോന്നാം. എന്നാൽ ഇതിന് പകരം മുട്ട, പനീർ, തൈര്, മുളപ്പിച്ച ധാന്യങ്ങൾ, അല്ലെങ്കിൽ പരിപ്പ് വർഗ്ഗങ്ങൾ എന്നിവ ഉൾപ്പെടുത്തിയാൽ അത് കുറച്ചുകൂടി വയറു നിറഞ്ഞ അനുഭവം നൽകും. കൂടാതെ പേശികളുടെ ആരോഗ്യത്തെ കൂടുതൽ ശക്തവും സുസ്ഥിരവുമായി നിലനിർത്താൻ ഇത് സഹായിക്കുകയും ചെയ്യും. പ്രഭാതഭക്ഷണം തിരഞ്ഞെടുക്കുന്നതിൽ ‘എളുപ്പത്തിനാണ്’ മുൻഗണന മിക്ക ആളുകൾക്കും രാവിലെയുള്ള സമയം ശാന്തവും സമാധാനപരവുമല്ല. കാണാതെപോയ സോക്സ് തിരയുന്നതിനിടയിലും കാറിന്റെ കീ കണ്ടുപിടിക്കുന്നതിനിടയിലും പെട്ടെന്ന് ഓടിത്തീർക്കുന്ന ഒരു 15 മിനിറ്റാണ് പലരുടെയും രാവിലെയുള്ള സമയം നിശ്ചയിക്കുന്നത്. ഈ തിരക്കിനിടയിൽ എളുപ്പത്തിനായി മിക്കവരും തിരഞ്ഞെടുക്കുന്ന പാക്കറ്റ് ബിസ്ക്കറ്റുകൾ, ടെട്രാ പാക്കുകളിലെ ഫ്രൂട്ട് ജ്യൂസുകൾ, മധുരമുള്ള ധാന്യവിഭവങ്ങൾ (cereals) എന്നിവ തികച്ചും വ്യത്യസ്തമായ ഒരു പ്രശ്നം സൃഷ്ടിക്കുന്നുണ്ട്. ബിസ്ക്കറ്റുകളും പാക്കറ്റ് ജ്യൂസുകളും മധുരമുള്ള പ്രഭാതഭക്ഷണങ്ങളും പെട്ടെന്ന് ഊർജ്ജം നൽകുമെങ്കിലും, അത് പിന്നീട് രക്തത്തിലെ പഞ്ചസാരയുടെ അളവ് പെട്ടെന്ന് കുറയാൻ കാരണമാകുന്നു. ഇത് ദിവസത്തിന്റെ ബാക്കി സമയങ്ങളിൽ കൂടുതൽ മധുരം കഴിക്കാനുള്ള ആഗ്രഹം വർധിപ്പിക്കും. രാവിലെ 9 മണിക്ക് മുമ്പ് തന്നെ ശരീരത്തിൽ സംഭവിക്കാവുന്ന ഏറ്റവും അപകടകരമായ കാര്യങ്ങളിൽ ഒന്നാണ് രക്തത്തിലെ പഞ്ചസാരയുടെ അളവ് പെട്ടെന്ന് കൂടുകയും കുറയുകയും ചെയ്യുന്ന ഈ അവസ്ഥ (spike and crash cycle). മധുരമുള്ള എന്തെങ്കിലും കഴിക്കുമ്പോൾ ഗ്ലൂക്കോസിന്റെ അളവ് അതിവേഗം ഉയരുന്നു, ശരീരം ഇതിനോട് ഇൻസുലിൻ ഉത്പാദിപ്പിച്ചുകൊണ്ട് പ്രതികരിക്കുന്നു, തുടർന്ന് ഗ്ലൂക്കോസിന്റെ അളവ് പെട്ടെന്ന് താഴേക്ക് പതിക്കുന്നു. ഇതോടെ, ഉച്ചയാകുന്നതിന് മുമ്പ് തന്നെ വീണ്ടും മധുരം കഴിക്കാനുള്ള അമിതമായ ആഗ്രഹമുണ്ടാകുന്നു. പാക്കറ്റ് ജ്യൂസുകൾ ഒരു പ്രത്യേക തരം കെണിയാണ്. അവയുടെ ലേബലിൽ “ഫ്രൂട്ട്” എന്ന് എഴുതിയിരിക്കുന്നത് കൊണ്ട് അവ ആരോഗ്യപ്രദമാണെന്ന് നമുക്ക് തോന്നും, എന്നാൽ വിപണിയിൽ ലഭിക്കുന്ന ഭൂരിഭാഗം ഫ്രൂട്ട് ജ്യൂസുകളിലും ഉയർന്ന അളവിൽ പഞ്ചസാര മാത്രമേ അടങ്ങിയിട്ടുള്ളൂ. യഥാർത്ഥ പഴങ്ങൾ കഴിക്കുമ്പോൾ ശരീരത്തിന് ലഭിക്കുന്നതും ഏറെ ഗുണകരവുമായ നാരുകൾ ഇത്തരം ജ്യൂസുകളിൽ വളരെ കുറവായിരിക്കും. എല്ലാവരും അവഗണിക്കുന്ന ഏറ്റവും ലളിതമായ കാര്യം ഉറങ്ങുമ്പോൾ പോലും നിങ്ങളുടെ ശരീരം അതിന്റെ ജോലികൾ തുടർന്നുകൊണ്ടേയിരിക്കുകയാണ്. ശ്വാസോച്ഛ്വാസം, ശരീര താപനില നിയന്ത്രിക്കൽ, ദഹനം, കോശങ്ങളുടെ അറ്റകുറ്റപ്പണികൾ എന്നിവയെല്ലാം നടക്കുന്നുണ്ട്. ഇതിനെല്ലാം ശരീരം വെള്ളം ഉപയോഗിക്കുന്നുണ്ട്. അതുകൊണ്ട് തന്നെ രാവിലെ അലാറം അടിക്കുമ്പോഴേക്കും, ശരീരത്തിന് ആവശ്യമായതിനേക്കാൾ കുറഞ്ഞ അളവിലുള്ള ജലം മാത്രമേ അതിൽ അവശേഷിക്കുന്നുണ്ടാകൂ. രാവിലെ എഴുന്നേറ്റയുടൻ വെള്ളം കുടിക്കുന്നത് ശരീരത്തിൽ വീണ്ടും ജലാംശം നിലനിർത്താനും, ദഹനത്തിനും, മൊത്തത്തിലുള്ള ഉപാപചയ പ്രവർത്തനങ്ങൾക്കും സഹായിക്കും. എന്നാൽ രാവിലെ എഴുന്നേൽക്കുമ്പോൾ ഭൂരിഭാഗം ആളുകളും ആദ്യം കയ്യിലെടുക്കുന്നത് വെള്ളമല്ല, മറിച്ച് ഫോണാണ്. അതിനുശേഷം ചായയും. ഇനി വെള്ളം കുടിക്കുകയാണെങ്കിൽ തന്നെ, അത് രാവിലെ കുറച്ചു സമയം കഴിഞ്ഞ് ദാഹം തോന്നുമ്പോൾ മാത്രമായിരിക്കും. യഥാർത്ഥത്തിൽ ദാഹം തോന്നുന്നത് തന്നെ ശരീരത്തിൽ ജലാംശം കുറഞ്ഞുതുടങ്ങി (dehydration) എന്നതിന്റെ ലക്ഷണമാണ്. മറ്റെന്തെങ്കിലും കഴിക്കുന്നതിനോ കുടിക്കുന്നതിനോ മുൻപ്, രാവിലെ ഒന്നുരണ്ട് ഗ്ലാസ് വെള്ളം കുടിച്ചുകൊണ്ട് ദിവസം ആരംഭിക്കുന്നത് തികച്ചും ചെലവില്ലാത്ത കാര്യമാണ്. പിന്നീട് നമ്മൾ കഴിക്കുന്ന ഭക്ഷണം ശരിയായ രീതിയിൽ ദഹിപ്പിക്കാൻ ഇത് ദഹനവ്യവസ്ഥയെ പ്രാപ്തമാക്കുന്നു. ദിവസത്തിന്റെ ആദ്യത്തെ ഒരു മണിക്കൂറിൽ നിങ്ങൾ ചെയ്യുന്നത് എന്തും ഒരു ശീലമായി മാറുന്നു, ശീലങ്ങൾ കാലക്രമേണ വളരുകയും ചെയ്യും. വർഷങ്ങളോളം എല്ലാ ദിവസവും നല്ലൊരു പ്രഭാതഭക്ഷണം കഴിക്കുന്നതിലൂടെ ഉണ്ടാകുന്ന വലിയൊരു മാറ്റം കൃത്യമായി അളന്നു തിട്ടപ്പെടുത്താൻ പ്രയാസമായിരിക്കും, എന്നാൽ അത് ശരീരത്തിൽ പ്രകടമായി അനുഭവിക്കാൻ സാധിക്കും.