ഓർഡിനറി ബസുകൾ സിറ്റി ഫാസ്റ്റ് ആക്കിയിട്ടില്ല; ബസുകൾ തമ്മിൽ യാത്രക്കാർക്ക് മാറിപ്പോകാതിരിക്കാനാണ് സ്റ്റിക്കർ പതിപ്പിച്ചത്’; വിശദീകരണവുമായി കെഎസ്ആർടിസി
‘
തിരുവനന്തപുരം: സൗജന്യ യാത്ര പദ്ധതി ആരംഭിച്ചതിന് പിന്നാലെ ഓര്ഡിനറി ബസ്സുകള് സിറ്റി ഫാസ്റ്റ് ആക്കിയെന്ന വാർത്ത നിഷേധിച്ച് കെഎസ്ആര്ടിസി. സ്ത്രീകള്ക്ക് സൗജന്യ യാത്ര ഓര്ഡിനറി ബസുകളില് മാത്രമാണുള്ളതെന്നും സിറ്റി ഫാസ്റ്റ് സര്വീസുകള് പദ്ധതിയില് ഉള്പ്പെട്ടിട്ടില്ലെന്നും കെഎസ്ആര്ടിസി വ്യക്തമാക്കി. പ്രിയദർശിനി പദ്ധതി നിലവിൽ വരുന്നതിന് മുൻപ് ഓർഡിനറി വിഭാഗത്തിൽ ഉണ്ടായിരുന്ന എല്ലാ സർവീസുകളും തുടർന്നും ഓർഡിനറി സർവീസായി തന്നെ നിലനിർത്തിയിട്ടുണ്ട്. വർഷങ്ങളായി ഒരേ നിറത്തിൽ സർവീസ് നടത്തുന്ന ഓർഡിനറി, സിറ്റി ഫാസ്റ്റ് ബസുകൾ തമ്മിൽ യാത്രക്കാർക്ക് മാറിപ്പോകാതിരിക്കാനും കൂടുതൽ വ്യക്തത ഉറപ്പാക്കാനുമാണ് കെഎസ്ആർടിസി ഇന്നലെ മുതൽ സിറ്റി ഫാസ്റ്റ് ബസുകളിൽ “CITY FAST” എന്ന് സ്റ്റിക്കർ പതിപ്പിച്ചു തുടങ്ങിയതെന്നും വിശദീകരണം. തിരുവനന്തപുരം നഗരത്തിൽ ഒരേ നീലയും വെള്ളയും നിറത്തിലാണ് ഓർഡിനറി ബസും സിറ്റി ഫാസ്റ്റ് ബസും പണ്ടുമുതലേ സർവീസ് നടത്തുന്നത്. വെള്ളയും നീലയും നിറമുള്ള ബസുകളെല്ലാം സൗജന്യയാത്രയുള്ള ഓർഡിനറി ബസുകളാണെന്ന് കരുതി വനിതാ യാത്രക്കാർക്ക് കൺഫ്യൂഷൻ ഉണ്ടാകാതിരിക്കാനാണ് ബസുകളുടെ മുൻവശത്തും പ്രവേശന വാതിലുകളുടെ ഇരുവശങ്ങളിലുമായി “CITY FAST” സ്റ്റിക്കറുകൾ പതിപ്പിച്ചത്. നിലവിൽ തിരുവനന്തപുരം നഗരത്തിലൂടെ 384 സിറ്റി ഫാസ്റ്റ് ബസുകളും നഗരമുൾപ്പെടെ ജില്ലയിലാകെ 687 ഓർഡിനറി ബസ്സുകളും സർവിസ് നടത്തുന്നുണ്ട്. പ്രിയദർശിനി പദ്ധതി പ്രഖ്യാപിച്ച സമയത്തുതന്നെ സർവീസുകളുടെ കൃത്യമായ പട്ടിക മാധ്യമങ്ങൾ ഉൾപ്പെടെയുള്ളവർക്ക് മുൻകൂട്ടി കൈമാറിയിട്ടുള്ളതുമാണെന്നും കെഎസ്ആർടിസി.
